स्वतंत्र अपघातात दोन दुचाकीस्वारांसह चौघांचा मृत्यू

स्वतंत्र अपघातात दोन दुचाकीस्वारांसह चौघांचा मृत्यू

मुंबई, ता. १५ : शहरात गेल्या चार दिवसांत विविध ठिकाणी घडलेल्या अपघातांमध्ये चौघांचा मृत्यू झाला. या अपघातांना जबाबदार वाहनचालकांविरोधात पोलिसांनी स्वतंत्र गुन्हा नोंदवून पुढील कायदेशीर कारवाई सुरू केली आहे.

पहिला अपघात मंगळवारी (ता. १२) शीव-पनवेल महामार्गावर गोवंडी येथील आर. के. सर्कल परिसरात घडला. गॅस वाहून नेणाऱ्या भरधाव टँकरने दुचाकीस्वार मंगेश यशवंत (वय ३८) या दुचाकीस्वारास मागून धडक दिली. रस्त्यावर पडलेल्या मंगेश यांच्या शरीरावरून टँकरचे पुढील चाक गेले. त्यामुळे त्यांचा जागीच मृत्यू झाला. याप्रकरणी गोवंडी पोलिसांनी टँकरचालक अशोक खिळेविरोधात गुन्हा नोंदवला. दुसरा अपघात बुधवारी (ता. १३) दुपारी बीकेसी कनेक्टरवर घडला. अब्दुल कुरेशी दुचाकीवरून या मार्गावरून वांद्रेच्या दिशेने जात असताना अज्ञात वाहनाने त्यांना धडक दिली. या घटनेत गंभीर जखमी झालेल्या अब्दुल यांचा उपचार मिळण्यापूर्वीच मृत्यू झाला. याप्रकरणी खेरवाडी पोलिसांनी अनोळखी वाहनचालकाविरोधात गुन्हा नोंदवला, तर तिसरा अपघात त्याच दिवशी सायंकाळी पश्चिम द्रुतगती मार्गावर वरील टीचर्स कॉलनी येथे घडला. निळकंठ चव्हाण या परिसरातून रस्ता ओलांडत असताना अज्ञात वाहनाने त्यांना उडवले. या अपघातात त्यांचाही जागीच मृत्यू झाला.

कारखाली चिरडून ठार
चौथा अपघात वांद्रे येथील कार्टर रोड परिसरात घडला. याच परिसरात राहणाऱ्या कस्तुरबा चौहान (वय ६०) घरासमोरील टपरीवर चहा पीत होत्या. तेथे एक मर्सिडीज कारचा चालक जीवा मुनेचा ही चहासाठी थांबला होता. चहा झाल्यावर त्याने कार सुरू केली. त्याला समोर बसलेल्या कस्तुरबा दिसल्या नाहीत. त्याने कारचा वेग वाढवला आणि कस्तुरबा कारखाली चिरडल्या गेल्या. याप्रकरणी वांद्रे पोलिसांनी चालक जीवा मुनेचाविरोधात गुन्हा नोंदवला.