पोलिसांच्या उदासिनतेवर न्यायालयाचे ताशेरे

पोलिसांच्या उदासीनतेवर न्यायालयाचे ताशेरे
मद्यपी मुलाकडून वृद्ध आई-वडिलांना मारहाणप्रकरणी संरक्षण देण्याचे आदेश
सकाळ वृत्तसेवा
मुंबई, ता. १५ ः वृद्ध दाम्पत्याला मद्यपी मुलाकडून निर्दयीपणे मारहाण केल्याच्या घटनेचे पुरावे देऊनही काहीच कारवाई न करणाऱ्या डोंबिवली पोलिसांच्या उदासीनतेवर उच्च न्यायालयाने ताशेरे ओढले. तसेच पीडित दाम्पत्याच्या घरी जाऊन त्यांना त्वरित संरक्षण देण्याचे आदेशही दिले.

मद्यपी भावाच्या शारीरिक छळापासून वृद्ध आई-वडिलांची सुटका करण्याच्या मागणी करणारी याचिका मोठ्या मुलीने उच्च न्यायालयात दाखल केली आहे. भावाचा अत्याचार सहन न झाल्याने आपण त्याचे कृत्य सीसीटीव्ही कॅमेऱ्यात कैद केल्याचेही याचिकेत म्हटले आहे. न्या. रवींद्र घुगे आणि न्या. गौतम अनखड यांच्या खंडपीठाने तिच्या याचिकेची आणि सीसीटीव्हीत कैद चित्रीकरणानंतरही वृद्ध आई-वडिलांवर अत्याचार करणाऱ्या मद्यपी मुलावर काहीच कारवाई न करणाऱ्या पोलिसांच्या कृतीवर संताप व्यक्त केला. याचिकाकर्तीचा भाऊ आई-वडिलांना रक्तबंबाळ होईपर्यंत मारहाण करताना दिसत आहे. डोंबिवली पोलिस ठाण्यातील सहाय्यक पोलिस निरीक्षक प्रवीण घुटुगडे यांना या मारहाणीचे सीसीटीव्हीतील चित्रण दाखवूनही त्यांनी काहीच कारवाई केली नाही. त्यामुळे मद्यपी भावाकडून आई-वडिलांना मारहाण सुरूच असल्याचा दावाही याचिकाकर्तीने केला आहे.

आरोपांची दखल घेऊन न्यायालयाने उपस्थित सहाय्यक पोलिस निरीक्षक घुटुगडे यांच्याकडे विचारणा केली. त्यावर सीसीटीव्हीत कैद चित्रण आपल्याला कधीच दाखवले नसल्याचे सांगितले; मात्र २५ जून आणि १ जुलै रोजी याप्रकरणी अदखलपात्र तक्रार नोंदवल्याचे त्यांनी न्यायालयाला सांगितले. त्याची दखल घेऊन याचिकाकर्तीने त्याच्याकडे तक्रार केल्याचे आणि त्याला सीसीटीव्ही चित्रीकरण दाखवल्याचे केलेले दावे चुकीचे असल्याचे शपथपत्रावर लिहून देण्याचे आदेश न्यायालयाने घुटुगडे यांना दिले.