मुंबईला पुढील दोन दिवस मुसळधारेचा इशारा

मुंबईला पुढील दोन दिवस मुसळधारेचा इशारा

सकाळ वृत्तसेवा
मुंबई, ता. १५ : हवामान विभागाने मुंबईसह आणि आसपासच्या जिल्ह्यांना शनिवारी (ता. १६) व रविवारी (ता. १७) असे दोन दिवस ऑरेंज अलर्ट जाहीर केला आहे. या कालावधीत मुसळधार ते अतिमुसळधार पावसाची शक्यता वर्तवण्यात आली आहे.

मुंबईसह उपनगरात गुरुवारी (ता. १४) पावसाचे पुनरागमन झाले आहे. त्यातच पुढील दोन दिवस पावसाचा जोर वाढणार असून मुसळधार ते अतिमुसळधार पाऊस कोसळण्याचा अंदाज हवामान विभागाने दिला आहे. मुंबईसह ठाणे, पालघर, रत्नागिरी आणि सिंधुदुर्ग या जिल्ह्यांना ऑरेंज अलर्ट तर रायगडसाठी रेड अलर्ट जारी करण्यात आला आहे. दरम्यान, आज मुंबईत संततधार पाऊस कायम होता. कुलाबा येथे कमाल तापमान २६.५ अंश सेल्सिअस नोंदवले गेले तर आर्द्रता तब्बल ९६ टक्के इतकी होती. येथे १७.० मिमी पावसाची नोंद झाली. तर सांताक्रूझ येथे कमाल तापमान २९.५ अंश सेल्सिअस नोंदवले गेले, आर्द्रता ९३ टक्के इतकी होती. येथे १६.७ मिमी पावसाची नोंद झाली.