समलिंगी जोडप्याची उच्च न्यायालयात धाव

समलिंगी जोडप्याची उच्च न्यायालयात धाव
भेटवस्तू कर नियमांविरोधात याचिका

सकाळ वृत्तसेवा,
मुंबई, ता. १५ : पती-पत्नीमधील भेटवस्तूंच्या कर आकारणीविरोधात समलिंगी जोडप्याने उच्च न्यायालयात धाव घेतली आहे. आपल्याला याप्रकरणी सापत्न वागणूक दिल्याचा आरोप या याचिकेत केला आहे. आम्हालाही भिन्नलिंगी दाम्पत्याचा लाभ द्यावा, अशी मागणी करण्यात आला आहे.

आयकर कायद्याच्या कलम ५६(२) (१०)च्या पाचव्या तरतुदीतील तो ‘पती-पत्नी’ या शब्दाच्या व्याप्ती आणि व्याख्येतून समलिंगी जोडप्यांना वगळण्यात आले आहे. त्यामुळे ‘पती-पत्नी’ हा शब्द असंवैधानिक घोषित करण्याची मागणी समलिंगी जोडप्याने याचिकेतून केली आहे. या याचिकेची दखल घेऊन न्या. बी. पी. कोलाबावाला आणि न्या. फिरदोष पुनीवाला यांच्या खंडपीठाने ही याचिका कायद्याच्या तरतुदीच्या घटनात्मकतेच्या वैधतेला आव्हान दिल्याचे नमूद करून अ‍ॅटर्नी जनरल यांना नोटीस बजावली असून, १८ सप्टेंबर रोजी सुनावणीवेळी भूमिका स्पष्ट करण्याचे आदेश दिले आहेत.

आयकर कायद्याच्या कलम ५६ (२)(१०) अंतर्गत पुरेशा मोबदल्याशिवाय मिळालेली ५० हजार रुपयांहून अधिकच्या मूल्याची रक्कम, मालमत्ता यावर ‘इतर स्रोतांतून मिळणारे उत्पन्न’ म्हणून कर आकारला जातो. या कलमाच्या पाचव्या तरतुदीनुसार नातेवाइकांकडून मिळालेल्या भेटवस्तूंना कर आकारणीतून सूट दिली आहे. नातेवाइकांकडून या शब्दाच्या व्याख्येत पती-पत्नी यांचाही समावेश असून, या कायद्यात ‘पती-पत्नी’ हा शब्द स्वतंत्रपणे परिभाषित केलेला नाही. बऱ्याच काळापासून नातेसंबंधात असलेले समलिंगी जोडपेही भिन्नलिंगी दाम्पत्याप्रमाणे असते. आम्हीही बऱ्याच काळापासून स्थिर नातेसंबंधात आहोत. त्यामुळे आयकर कायद्याच्या कलम ५६(२) (१०) च्या पाचव्या तरतुदीचा आम्हालादेखील लाभ देण्यात यावा. तसेच या तरतुदीतील पती-पत्नी या शब्दाच्या व्याख्येत समलिंगी जोडप्यांचाही समावेश करण्याचे आदेश द्यावेत, अशी मागणी याचिकाकर्त्या जोडप्याने याचिकेत केली आहे.