चित्रकार नीलेश वेदे यांना राष्ट्रीय पुरस्कार

चित्रकार नीलेश वेदे यांना राष्ट्रीय पुरस्कार

सकाळ वृत्तसेवा
मुंबई, ता. १६ : प्रसिद्ध चित्रकार नीलेश रवींद्र वेदे यांच्या ‘आय, मी अँड मायसेल्फ’ या चित्रकृतीला ललित कला अकादमी आयोजित ६४व्या राष्ट्रीय कला प्रदर्शनात राष्ट्रीय पुरस्कार जाहीर झाला आहे. हा पुरस्कार भारत सरकारच्या सांस्कृतिक मंत्रालयाकडून घोषित झाला असून नवी दिल्ली येथे राष्ट्रपती यांच्या हस्ते हा पुरस्कार वेदे यांना प्रदान करण्यात येणार आहे.

देशभरातून आलेल्या तब्बल ५,९२२ कलाकृतींपैकी नीलेश वेदे यांच्या चित्राची निवड झाली आहे. भारतीय चित्रकला क्षेत्रातील हा सर्वोच्च मानाचा पुरस्कार मानला जातो. दिल्लीत भारत सरकारच्या सांस्कृतिक मंत्रालयाने आयोजित केलेल्या चित्र प्रदर्शनाच्या उद्‍घाटन समारंभात वेदे यांचा विशेष सन्मान पद्मभूषण शिल्पकार राम व्ही. सुतार आणि केंद्रीय सांस्कृतिक व पर्यटनमंत्री गजेंद्रसिंह शेखावत यांच्या हस्ते झाला. या वेळी मंत्रालयातील वरिष्ठ अधिकारी व ललित कला अकादमीचे मान्यवर उपस्थित होते. वेदे यांनी चित्रकलेत स्वतंत्र शैली निर्माण केली असून त्यांच्या चित्रांमध्ये मानवी भावनांचे गहन दर्शन घडते. त्यांच्या कलाकृतींमध्ये ‘सर्रियलिझम’ आणि शाब्दिक आकारांचे मिश्रण विशेषत्वाने जाणवते. यापूर्वी त्यांना दोनदा सांस्कृतिक मंत्रालयाच्या शिष्यवृत्ती, तसेच प्रफुल्ला धहानुकर फाउंडेशनचा राज्य पुरस्कार मिळाला आहे. त्यांनी जहांगीर कलादालनासह देश-विदेशातील नामांकित कलादालनांत सहा वैयक्तिक व तीसपेक्षा जास्त सामूहिक प्रदर्शने भरवली आहेत. तसेच ३० हून अधिक राष्ट्रीय व आंतरराष्ट्रीय कला शिबिरांत सहभाग घेतला आहे. त्यांच्या कलाकृती अनेक नामवंत संग्रहकांच्या संग्रहात असून या राष्ट्रीय पुरस्कारामुळे त्यांच्या कलात्मक प्रवासाला नवी उंची लाभली आहे.

........
नीलेश वेदे यांच्या कलाकृती डॉ. एपीजे अब्दुल कलाम, सलमान खान, आमिर खान, जॅकी श्रॉफ, सुभाष घई, हृतिक रोशन, सोनाक्षी सिन्हा, महेश मांजरेकर, अनुपम खेर, अतुल अग्निहोत्री, हर्ष गोयंका, बोनी कपूर, आरिफ झकारिया, वर्ल्ड ट्रेड सेंटर (पुणे), डाबर लिमिटेड, फेबर कासल इत्यादी ठिकाणी संग्रहित आहेत.
..........