वरळीत ‘परिवर्तन दहीहंडी उत्सव’

महापालिकेत परिवर्तन अटळ
मुख्यमंत्री देवेंद्र फडणवीस यांचा विश्‍वास : वरळीत शक्तिप्रदर्शन

सकाळ वृत्तसेवा
मुंबई, ता. १६ : दहीहंडी उत्सवाच्या निमित्ताने राजकीय पक्षांच्या एकमेकांवर कुरघोडी करण्याची संधी साधली. शिवसेना (उबाठा)चे नेते आदित्य ठाकरे यांच्या वरळी मतदारसंघात भाजपने डझनभर हंड्यांच्या माध्यमातून आदित्य यांच्यासह महाविकास आघाडीला घेरण्याचा प्रयत्न केला. जांबोरी मैदानावर भाजपकडून परिवर्तन दहीहंडी उत्सव साजरा करण्यात आला. या वेळी मुख्यमंत्री देवेंद्र फडणवीस यांनी पालिकेतील पापाची हंडी आम्ही फोडल्याचे सांगत महापालिकेत परिवर्तन अटळ असल्याचा विश्‍वास व्यक्त केला.

मुख्यमंत्री फडणवीस यांनी या वेळी उद्धव ठाकरे यांच्यावर टीका केली. ते म्हणाले, ‘‘महापालिकेत परिवर्तन अटळ आहे. पालिकेतील पापाची हंडी आम्ही फोडली आहे. आता त्या ठिकाणी विकासाची हंडी लागेल. त्या विकासाच्या हंडीतले जे काही लोणी आहे, ते जनसामान्यांपर्यंत नेणार आहोत. वरळीतील लोकांना चांगले दिवस आणायचे आहेत. त्यासाठी आपल्याला अधिक चांगले काम करायचे आहे. येथील लोकांना या विभागातदेखील परिवर्तन करायचे असून, या वेळी नक्कीच परिवर्तन होईल,’’ असा आशावाद व्यक्त करून त्यांनी कार्यकर्त्यांना कामाला लागण्याचे निर्देशही दिले.

भाजपचे पदाधिकारी संतोष पांडे यांनी या ‘परिवर्तन दहीहंडी महोत्सव २०२५’चे आयोजन केले होते. यामध्ये सकाळी ११ ते दुपारी दोन वाजेपर्यंतचा वेळ वरळीतील दहीहंडी पथकांसाठी राखून ठेवण्यात आलेला होता. यामुळे वरळीतील गोविंदा पथकांनी मोठ्या संख्येने सहभाग नोंदवला. जांबोरी मैदानावर गेल्या चार वर्षांपासून भाजपपुरस्कृत दहीहंडी उत्सव साजरा होत आहे. यंदादेखील मुंबईतील सर्वात मोठा दहीहंडी उत्सव या ठिकाणी झाल्याचा दावा आयोजकांनी केला. या ठिकाणी दिवसभर राजकीय नेत्यांची मांदियाळी येथे दिसली. या ठिकाणी मुख्यमंत्री देवेंद्र फडणवीस, मंत्री आशीष शेलार, मंगलप्रभात लोढा, संजय उपाध्याय उपस्थित होते.

आयोजक संतोष पांडे यांनी सांगितले, की गेल्या चार वर्षांपासून आम्ही हा उत्सव साजरा करीत आहोत. कधी विकासाची, कधी भ्रष्टाचाराची हंडी फोडून हा उत्सव साजरा केला. यंदा परिवर्तनाची दहीहंडी आयोजित केली असून, वरळीतील लोक या विभागात नक्कीच परिवर्तन करतील, असा विश्वास त्यांनी व्यक्त केला.

...
राजकीय पक्षांमध्ये जोरदार चुरस
भाजपकडून वरळी परिसरामध्ये विविध दहीहंडी उत्सवांचे आयोजन करण्यात आले होते. उत्सवाच्या माध्यमातून भाजपने जोरदार शक्तिप्रदर्शन करीत आपली राजकीय ताकद वाढवण्याचा प्रयत्न केला. पूर्वी या मैदानावर माजी मंत्री सचिन अहिर यांच्या माध्यमातून राष्ट्रवादी काँग्रेस पक्षाचा उत्सव होत असे. त्यानंतर शिवसेना आमदार सुनील शिंदे यांच्या माध्यमातून शिवसेनेने येथे आपला जम बसवत प्रस्थ वाढवले. याच मतदारसंघातून आदित्य ठाकरे हे आमदार झाल्याने येथील दहीहंडी उत्सवाची रंगत अधिक वाढली. उत्सवासाठी जांबोरी मैदान मिळवण्यासाठी राजकीय पक्षांमध्ये जोरदार चुरसदेखील बघायला मिळू लागली; मात्र गेल्या चार वर्षांपासून भाजपने मैदान मिळवत आपली राजकीय स्थिती अधिक मजबूत करण्याचा प्रयत्न केला आहे.

इच्छुक उमेदवारांची स्पर्धा
बोरिवलीत भाजप आमदार संजय उपाध्याय, मागाठाणे येथे आमदार प्रकाश सुर्वे, घाटकोपर पश्चिम येथे आमदार राम कदम, मुलुंड येथे किरीट सोमय्या, शिवसेना भवन येथे युवासेनेची दहीहंडी, दादर येथे मानाची आयडियल दहीहंडी उभारण्यात आली होती. त्यातच आगामी पालिका निवडणुका लक्षात घेत माजी नगरसेवक तसेच विविध राजकीय पक्षांतील इच्छुकांनी विविध ठिकाणी दहीहंडी उत्सावाचे आयोजन केले होते.

........