वैद्यकीय प्रवेशाच्या प्रलोभनाने फसवणारे अटकेत

वैद्यकीय प्रवेशाच्या प्रलोभनाने फसवणारे अटकेत

मुंबई, ता. १६ : लोकप्रतिनिधींच्या कोट्यातून मुलीला वैद्यकीय प्रवेश मिळवून देण्याची प्रलोभन दाखवून विवाहितेकडून साडेचौदा लाख रुपये उकळणाऱ्या भामट्यांना आझाद मैदान पोलिसांनी दिल्ली आणि उत्तर प्रदेशातून अटक केली. आरोपींकडून फसवणूक रक्कम हस्तगत करण्यात पोलिसांना यश आले.

कृष्णमोहन शर्मा आणि एनूल हसन अशी आरोपींची नावे आहेत. त्यापैकी हसन उत्तर प्रदेशात एका डॉक्टरकडे सहाय्यक म्हणून काम करतो. तो तक्रारदार विवाहितेचा दूरचा नातेवाईक आहे. तक्रारदार महिला धोबीतलाव परिसरात मुलीसोबत राहते. मुलीला कमी गुण मिळाल्याने वैद्यकीय शिक्षणासाठी प्रवेश मिळणे अशक्य वाटत होते. तेव्हा आरोपी एनूल याने लोकप्रतिनिधी कोट्यातून सहज प्रवेश मिळवून देतो, असे सांगत महिलेकडून टप्प्याटप्याने साडेचौदा लाख उकळले; मात्र पैसे देऊनही प्रवेश न मिळाल्याने महिलेने चौकशी सुरू केली. त्यानंतर फसवणूक झाल्याचे लक्षात येताच या महिलेने आझाद मैदान पोलिस ठाण्यात तक्रार दाखल केली. आझाद मैदान पोलिस ठाण्याचे वरिष्ठ निरीक्षक श्रीकांत आदाटे यांच्या मार्गदर्शनाखाली सहाय्यक निरीक्षक लीलाधर पाटील आणि पथकाने तांत्रिक तपासाआधारे एनूल आणि त्याच्या साथीदारास बेड्या ठोकण्यात आल्या आहेत.