लँडिंगवेळी विमान धावपट्टीला घासले

लँडिंगवेळी विमान
धावपट्टीला घासले
विमानतळावर मोठा अपघात टळला
सकाळ वृत्तसेवा
मुंबई, ता. १६ : मुसळधार पाऊस आणि प्रतिकूल हवामानात मुंबई विमानतळावर उतरताना इंडिगोच्या विमानाचा मागील भाग धावपट्टीला घासल्याची घटना शनिवारी पहाटे घडली. या वेळी वैमानिकाने प्रसंगावधान राखत विमान सुखरूप उतरवल्याने मोठी दुर्घटना टळली.
बँकॉकहून मुंबईला येणारे इंडिगोचे एअरबस ए-३२१ विमान शनिवारी पहाटे तीन वाजण्याच्या सुमारास विमातळावर उतरणार होते; परंतु रात्रभर सुरू असलेला मुसळधार पाऊस आणि खराब हवामानामुळे विमान कमी उंचीवरून उतरवण्याचा प्रयत्न करीत असताना मागील भाग धावपट्टीला घासला गेला. त्यानंतर वैमानिकाने दुसऱ्या प्रयत्नात विमान यशस्वीपणे उतरवले. दरम्यान, विमानातील सर्व प्रवासी आणि कर्मचारी सुरक्षित असून, नागरी विमान वाहतूक महासंचालनालयाने (डीजीसीए) या प्रकरणाच्या चौकशीचे आदेश दिले आहेत. तूर्तास विमानाला ग्राउंड करण्यात आले असून, संपूर्ण चौकशी आणि दुरुस्तीनंतरच पुन्हा उड्डाण करण्याची परवानगी दिली जाणार असल्याचे डीजीसीएच्या अधिकाऱ्याने सांगितले. दरम्यान, प्रवासी आणि कर्मचाऱ्यांची सुरक्षा ही आमची सर्वोच्च प्राथमिकता आहे. सर्व आवश्यक तपासणी आणि दुरुस्ती केल्यानंतरच विमान पुन्हा सेवेत आणण्यात येईल, असे इंडिगोने म्हटले आहे.