एमटीएनएलची भूमिगत कॉपर केबल चोरणारी टोळी अटकेत

कॉपर केबल चोरणारे अटकेत
मुंबई : शीव परिसरात एमटीएनएलची अंडरग्राउंड कॉपर केबल चोरणाऱ्या टोळीला पोलिसांनी रंगेहाथ पकडले. याप्रकरणी १४ जणांना अटक करण्यात आली आहे. तसेच गुन्ह्यात वापरलेले जेसीबी वाहनही जप्त करण्यात आले. शनिवारी पहाटे शीव पोलिसांनी ही कारवाई केली.
पोलिस निरीक्षक संतोष शेवाळे, उपनिरीक्षक किरण भोसले आणि पथक गोपनीय माहितीच्या आधारे डालडा कंपनीसमोर पोहाेचले, तेव्हा काही व्यक्ती जेसीबीच्या सहाय्याने डकमधून कॉपर केबल बाहेर काढताना आढळल्या. पोलिसांनी त्यांच्याकडे अधिकृत परवानगी व ओळखपत्राची विचारणा केली, मात्र ओळखपत्र सादर करण्यात आरोपी अपयशी ठरले. अधिक चौकशीअंती ते कॉपर केबल चोरी करीत असल्याचे निष्पन्न झाले. याची माहिती मिळताच एमटीएनएलच्या वडाळा कार्यालयाचे व्यवस्थापक विनोद नगराळे यांनी शीव पोलिस ठाण्यात फिर्याद दिली. त्यानुसार गुन्हा नोंदवून शीव पोलिसांनी १४ जणांना अटक केली.