पीएचडीच्या विद्यार्थ्यांना मार्गदर्शक मिळेना

पीएचडीच्या विद्यार्थ्यांना मार्गदर्शक मिळेना
मुंबई विद्यापीठात अनेक प्राध्यापकांचे अर्ज प्रलबिंत

मुंबई, ता. १७ : मुंबई विद्यापीठातील कला, वाणिज्य व विज्ञान आदी शाखांमध्ये प्राध्यापकांचे पीएचडी मार्गदर्शकासाठी (गाईडशीप) मोठ्या प्रमाणात अर्ज सादर होत असले तरी त्यातुलनेत अर्ध्याही प्राध्यापकांना गाईडशीपची संधी मिळत नसल्याची माहिती समोर आली आहे. याचा फटका विद्यार्थ्यांना बसत आहे.

विद्यापीठाचे स‍िनेट सदस्य डॉ. सखाराम डाखोरे यांनी विद्यापीठाच्या सिनेटमध्ये तारांकित प्रश्न उपस्थित करून या विषयाची माहिती विचारली होती. त्यात त्यांनी शैक्षणिक वर्ष २०२४-२०२५ मध्ये कला, वाणिज्य व विज्ञान या शाखांमधील किती प्राध्यापकांचे पीएचडी गाईडशीपसाठी अर्ज प्राप्त झाले होते व किती प्राध्यापकांना गाईडशीप दिली गेली, असा प्रश्न उपस्थित केला होता. त्यात विद्यापीठाने दिलेल्या माहितीनुसार कला, विज्ञान, वाणिज्य अशा शाखानिहाय १३५ प्राध्यापकांचे अर्ज आले होते, त्यातील केवळ ६० प्राध्यापकांना शाखानिहाय गाईडशीप देण्यात आल्याची माहिती देण्यात आली. विद्यापीठाकडे गाईडशीपसाठी आलेल्या अर्जांमध्ये कला शाखेसाठी ३३ अर्ज आले होते, त्यापैकी केवळ १७ प्राध्यापकांना संधी मिळाली. तसेच वाणिज्यसाठी अर्ज आलेल्या ३१ पैकी केवळ १५ जणांना आणि वाणिज्यसाठी अर्ज केलेल्या ७१ पैकी २८ प्राध्यापकांना गाईडशीप मिळाली. सिनेटमध्ये आपण अनेक प्रश्न उपस्थित केले होते, त्यातील काही प्रश्नांचे आपल्याला समाधानकारक उत्तरे मिळाली नसल्याचे डॉ. डाखोरे यांनी सांगितले.

संशोधन हा शिक्षण व्यवस्थेतील महत्त्वाचा भाग आहे, परंतु विद्यापीठ त्यासंदर्भात गंभीर असल्याचे दिसून येत नाही. अनेक विषयांच्या आर. आर. सी. झालेल्या नाहीत. त्यामुळे विद्यावाचस्पती (पीएचडी) ही पदवी प्राप्त करू इच्छिणारे अनेक विद्यार्थी त्यापासून वंचित राहिले आहेत. मार्गदर्शकाची सर्व पात्रता पूर्ण करणाऱ्या व संशोधन मार्गदर्शक म्हणून काम करू इच्छिणाऱ्या अनेक प्राध्यापकांचे प्रस्ताव एक-दोन वर्षांपासून विद्यापीठाकडे पडून आहेत. त्याचबरोबर काही प्राध्यापकांना विद्यापीठातील विभागप्रमुखांनी ना हरकत प्रमाणपत्र दिले नाही‌, अशी बाबही विद्यापीठाच्या निदर्शनास आणून दिली होती, अशी माहितीही डॉ. डाखोरे यांनी दिली.

--
गाईडशीपसाठीच्या अर्जांची स्थिती
शाखा प्राप्त अर्ज मंजुरी
कला ३३ १७
वाणिज्य ३१ १५
विज्ञान ७१ २८
एकूण १३५ ६०