मुंबई मेट्रो-४ साठी स्वयंचलित तिकीटप्रणाली विकसित होणार

मुंबई मेट्रो-४ साठी स्वयंचलित तिकीटप्रणाली विकसित होणार
एमएमआरडीए आणि ओरियनप्रोमध्ये करार
सकाळ वृत्तसेवा
मुंबई, ता. १७ : मुंबई मेट्रो-४ आणि ४ ए साठी स्वयंचलित तिकीट प्रणाली (ऑटोमॅटिक फेअर कलेक्शन सिस्टम) विकसित केली जाणार आहे. त्यासाठी एमएमआरडीए आणि ऑरियनप्रो यांच्यामध्ये करार झाला आहे. त्यानुसार तिकीट प्रणाली विकसित करणे, त्याचा पुरवठा करणे, स्थानकांवर बसवणे आणि देखभालीची जबाबदारी संबंधित कंपनीवर असणार आहे.
मुंबईसह एमएमआरमधील वाहतुकीला चालना देण्यासाठी एमएमआरडीएकडून मेट्रोचे जाळे उभारले जात आहे. त्याचाच भाग म्हणून एमएमआरडीए वडाळा-कासारवडवली हा मेट्रो-४ आणि पुढे गायमुखपर्यंत मेट्रो-४ए हा तब्बल ३२ किलोमीटर लांबीचा मेट्रो मार्ग आहे. त्याचे काम अंतिम टप्प्यात आहे. त्यामुळे एमएमआरडीएने आवश्यक सेवा वेगवगेळ्या कंपन्यांच्या माध्यमातून उपलब्ध करून दिल्या जात आहेत. त्याचाच भाग म्हणून ऑरियनप्रो सोल्यूशन्स लिमिटेडला ऑटोमॅटिक फेअर कलेक्शन सिस्टम डिझाइन करणे, त्याचा पुरवठा, अंमलबजावणी आणि देखभालीचे काम दिले आहे. सुमारे २५० कोटी रुपयांचे हे काम असणार आहे. पुढील पाच वर्षांची देखभाल आणि सहाय्य यांचाही या करारात समावेश असल्याचे ऑरियनप्रोने स्पष्ट केले आहे. दिल्ली मेट्रो आणि चेन्नई मेट्रोनंतर ऑरियनला मुंबईचा हा प्रकल्प मिळाला आहे.