मुंबईत पावसाची संततधार

मुंबईत पावसाची संततधार

मुंबई, ता. १७ : संपूर्ण शहरात रविवारी (ता. १७) दिवसभर पावसाची संततधार सुरू होती. कधी रिमझिम, तर कधी मुसळधार अशा स्वरूपात कोसळलेल्या पावसामुळे शहर व उपनगरांत एकूण २२ मिमी पावसाची नोंद झाली. कुलाबा वेधशाळेत २०.४ मिमी आणि सांताक्रूझ वेधशाळेत २०.९ मिमी पावसाची नोंद झाली. शहरात २३ मिमी, पूर्व उपनगरात २५ मिमी आणि पश्चिम उपनगरात १८ मिमी पाऊस झाला.

मुंबईत मुसळधार पावसामुळे विविध तक्रारी नोंदल्या गेल्या. शहरात पाच आणि पश्चिम उपनगरात एक अशा एकूण सहा शॉर्टसर्किटच्या घटना घडल्या. शहरात सहा, पूर्व उपनगरात तीन आणि पश्चिम उपनगरात १० अशा एकूण १९ ठिकाणी झाडे आणि फांद्या कोसळल्या. तसेच पूर्व उपनगरातील दोन ठिकाणी भिंती किंवा घराचा भाग कोसळला. या सर्व घटनांमध्ये कोणतीही जीवितहानी झालेली नाही. दरम्यान, शहरातील वाहतूक व्यवस्था सुरळीत सुरू होती, अशी माहिती महापालिका प्रशासनाकडून देण्यात आली. दरम्यान, कुलाबा वेधशाळेने पुढील २४ तासांसाठी दिलेल्या अंदाजानुसार, मुंबई व उपनगरांत जोरदार ते अतिजोरदार पाऊस पडण्याची शक्यता आहे. तसेच ४० ते ६० किमी प्रतितास वेगाने वारे वाहण्याचा अंदाज आहे. मुंबईत पावसाची तीव्रता आणखी वाढण्याची शक्यता हवामान विभागाने व्यक्त केली आहे.