मुसळधार पावसामुळे विमान वाहतुकीला लेटमार्क

मुसळधार पावसामुळे विमान वाहतुकीला लेट मार्क
मुंबई, ता. १८ : मुंबईत सलग तिसऱ्या दिवशी मुसळधार पावसामुळे प्रवाशांच्या अडचणीत भर पडली. छत्रपती शिवाजी महाराज आंतरराष्ट्रीय विमानतळ येथे विमान वाहतुकीला सोमवारी (ता. १८) लेट मार्क लागला. खराब हवामानामुळे अनेक उड्डाणांवर परिणाम झाला. काही उड्डाणे रद्द करण्यात आली आणि एक उड्डाण वळवण्यात आले. सरासरी उड्डाण विलंब सुमारे ५६ मिनिटे होता.

मुंबई आंतरराष्ट्रीय विमानतळावर मुसळधार पावसामुळे दृश्यमानता कमी होती. परिस्थिती लक्षात घेता विमानतळ प्रशासनाने प्रवाशांना
आपल्या प्रवासाबाबत अद्ययावत माहिती घेण्याचे आवाहन केले आहे. यामध्ये प्रतिकूल हवामान आणि मुसळधार पावसामुळे प्रवाशांना विमानतळावर जाण्यापूर्वी त्यांच्या संबंधित विमान कंपन्यांशी संपर्क साधावा. सुरक्षा प्रक्रियेसाठी पुरेसा वेळ मिळावा, यासाठी प्रवाशांना नेहमीपेक्षा लवकर विमानतळावर पोहोचावे असा सल्ला देण्यात आला. या वेळी इंडिगोच्या प्रवाशांची विमानतळावर मोठी गर्दी झाली होती. त्यातच विमानतळाकडे जाणारी वाहतूक अनेक भागांत मंदावली होती. अकासा एअरनेही प्रवाशांना विमानतळावर लवकर पोहोचण्याचे आवाहन केले होते.