बेस्ट बसने चिरडल्याने मायलेकाचा मृत्यू

बेस्ट बसने चिरडल्याने मायलेकाचा मृत्यू
वडाळा चर्चजवळील घटना

सकाळ वृत्तसेवा
मुंबई, ता. १८ : मुंबईत दोन दिवसांपासून सुरू असलेल्या मुसळधार पावसामुळे शहरात जनजीवन विस्कळित झालेले असतानाच सोमवारी (ता. १८) दुपारी वडाळा चर्चजवळ बेस्ट बसचा भीषण अपघात घडला. मुसळधार पावसामुळे शाळा सुटल्याने घरी परतणाऱ्या आई-मुलाला बेस्टच्या बसने चिरडले. या अपघातात दोघांचा मृत्यू झाला.
बेस्टच्या आणिक आगारातून चालणारी एसएमटीएटीपीएल (डागा ग्रुप वेटलीज)ची ए-१७४ क्रमांकाची बस दुपारी ३.१० वाजता वीर कोतवाल उद्यानाहून भरणी नाक्याकडे जात असताना हा अपघात झाला. बसचालक बापूराव शिवाजी नागवणे (वय ४१) यांनी रस्ता ओलांडणाऱ्या लिओबा सेल्वराज (वय ३८) आणि तिचा मुलगा अँथनी सेल्वराज (वय ८) यांना धडक दिली. दोघेही पुढच्या डाव्या चाकाखाली आल्याने गंभीर जखमी झाले. पोलिसांनी तातडीने मुलाला केईएम रुग्णालयात व आईला सायन रुग्णालयात नेले; मात्र दोघांना डॉक्टरांनी मृत घोषित केले. घटनेची नोंद माटुंगा पोलिसांनी केली असून, चौकशी सुरू केली आहे. दरम्यान, गेल्या दोन वर्षांत कंत्राटी बसचालकांच्या बेफिकिरीमुळे १५हून अधिक नागरिकांचा बळी गेला आहे. ९ डिसेंबर २०२४ रोजी कुर्ला पश्चिमेत घडलेल्या भीषण अपघातात तब्बल १५ जणांना बसने चिरडले होते, त्यात नऊ जणांचा मृत्यू झाला होता.