कोकण मंडळाच्या घरांसाठी अर्जांचा पाऊस!

कोकण मंडळाच्या घरांसाठी अर्जांचा पाऊस!
आतापर्यंत ९८,७२० अर्ज; ६६,०८६ जणांनी भरली अनामत रक्कम
सकाळ वृत्तसेवा
मुंबई, ता. १९ : म्हाडाच्या कोकण मंडळाने ठाणे, नवी मुंबई, कल्याण, डोंबिवली येथील ५,२५७ घरांच्या विक्रीसाठी लाॅटरी काढली जाणार आहे. त्यासाठी म्हाडाकडे इच्छुकांच्या ऑनलाइन अर्जाचा पाऊस पडत आहे. दररोज हजारो अर्ज पोर्टलवर येत असून, आतापर्यंत आलेल्या एकूण अर्जांची संख्या तब्बल ९८ हजार ७३० वर पोहोचली आहे. त्यापैकी ६६ हजार ८६ जणांनी अनामत रक्कम भरली आहे. अर्ज करण्यासाठी आणखी नऊ दिवस बाकी असल्याने घरांसाठी मोठी स्पर्धा निर्माण होणार असल्याचे दिसत आहे.
म्हाडाच्या कोकण मंडळाने जाहीर केलेल्या पाच हजार २८५ घरांच्या लाॅटरीत अत्यल्प म्हणजे वार्षिक सहा लाखांपर्यंत उत्पन्न असलेल्या गटासाठी तब्बल चार हजार ८०२ घरे राखीव ठेवली आहेत. तसेच नऊ लाखांपर्यंत वार्षिक उत्पन्न असलेल्या अल्प उत्पन्न गटातील कुटुंबांसाठी ४५५ घरे राखीव आहेत. या घरांसाठी ऑनलाइन अर्ज करण्याच्या प्रक्रियेला सोमवार, १४ जुलैपासून सुरुवात झाली असून, १३ ऑगस्ट अर्ज करण्याची अंतिम मुदत होती; मात्र अनेकांना उत्पन्नाचा दाखला मिळण्यास विलंब झाल्याने किंवा अन्य कारणाने अर्ज न भरता आल्याने म्हाडाने अर्ज करण्याची मुदत २८ ऑगस्टपर्यंत वाढवली आहे. त्यानुसार गेल्या ३६ दिवसांत घरासाठी ऑनलाइन अर्ज केलेल्यांची संख्या एक लाखाच्या घरात पोहोचली आहे.
--
मुंबई मंडळाशी स्पर्धा
म्हाडाच्या कोकण मंडळाने फेब्रुवारी २०२४मध्ये ठाणे शहर आणि पालघर, रायगड जिल्ह्यातील विविध गृहनिर्माण योजनेअंतर्गत असलेल्या ५,३११ सदनिकांच्या विक्रीसाठी काढलेल्या लाॅटरीला जवळपास २५ हजार अर्ज आले होते. त्याचवेळी मुंबई मंडळाने मुंबईतील २,०३० घरांच्या विक्रीसाठी काढलेल्या लॉटरीला एक लाख १५ हजार एवढे अर्ज आले होते; मात्र सध्या कोकण मंडळाच्या लॉटरीसाठी आलेले अर्ज आणि अर्ज करण्यासाठी असलेली मुदत पाहता कोकण मंडळ हे मुंबई मंडळाशी स्पर्धा करणार असल्याचे चित्र आहे.