पदपथांवर अतिक्रमणाचा कुणालाही अधिकार नाही!

पदपथांवर अतिक्रमणाचा कुणालाही अधिकार नाही!
पवईतील झोपडीधारकांची याचिका फेटाळली
सकाळ वृत्तसेवा
मुंबई, ता. १९ ः पदपथांवर अतिक्रमण करण्याचा कोणालाही कायदेशीर अधिकार नाही, असे स्पष्ट करून उच्च न्यायालयाने पवई येथील जय भीमनगरमधील झोपडीधारकांना कारवाईपासून दिलासा देण्यास नुकताच नकार दिला. तसेच महापालिकेला या झोपड्यांवरील पाडकाम करण्यास परवानगी दिली.
मुंबईतील पदपथावरील अतिक्रमणाच्या धोक्यांबाबत चिंता व्यक्त करताना सार्वजनिक ठिकाणी अतिक्रमण करून नागरिकांना जीव धोक्यात घालून रस्त्यावरून चालण्यास भाग पाडायचे का, असाही प्रश्न न्या. गिरीश कुलकर्णी आणि न्या. आरिफ डॉक्टर यांच्या खंडपीठाने उपस्थित केला. मुंबईतील सर्व अतिक्रमण असलेल्या पदपथांचे सर्वेक्षण करण्यासाठी अतिरिक्त आयुक्त आणि दोन वरिष्ठ अधिकाऱ्यांचा समावेश असलेला एक विशेष कक्ष स्थापन करण्याचे आदेश महापालिकेला दिले. त्यानंतर पदपथांवरील अतिक्रमणांवर कारवाई केली जाईल, असेही न्यायालयाने स्पष्ट केले.
---
गृहनिर्माण संस्थेचीही याचिका
महापालिकेकडून या झोपड्यांवर सोमवारी कारवाई करण्यात येणार होती. त्यामुळे येथील २३ झोपडीधारकांनी या कारवाईविरोधात उच्च न्यायालयात आव्हान देत अंतरिम संरक्षण देण्याची मागणी केली होती. जूनमध्ये तिवोली आणि एविता सहकारी गृहनिर्माण संस्थेने उच्च न्यायालयात धाव घेऊन या झोपडीधारकांनी सोसायटीसमोरील पदपथावर केलेली अतिक्रमणे हटवण्याची मागणी केली होती. त्यामुळे सोसायटीतील रहिवाशांना त्रास होत असल्याचा दावा केला होता.