मोनोरेलमध्ये अडकलेल्या ३०० प्रवाशांची सुटका

मोनोरेलमध्ये अडकलेल्या ३०० प्रवाशांची सुटका
सहा जणांना त्रास

सकाळ वृत्तसेवा
मुंबई, ता. १९ : चेंबूर (पूर्व) येथील माहुल परिसरात भक्ती पार्क व म्हैसूर कॉलनी या स्थानकांदरम्यान मोनोरेलमध्ये बिघाड होऊन ३००हून अधिक प्रवासी अडकून पडले होते. यात सहा प्रवाशांना किरकोळ त्रास झाला. ही घटना मंगळवारी (ता. १९) सायंकाळी साडेसहा वाजण्याच्या सुमारास घडली.
घटनेची माहिती प्रवासी जीवन माठरे यांनी दिली. तत्काळ मुंबई अग्निशमन दल, पोलिस, तसेच ‘१०८’ अँब्युलन्स सेवेला पाचारण करण्यात आले. बचाव वाहनाच्या साहाय्याने प्रवाशांची सुरक्षित सुटका करण्यात आली. काही प्रवाशांना श्वासोच्छ्वासाचा त्रास झाला. ‘१०८’ अँब्युलन्स समन्वयकांनी दिलेल्या माहितीनुसार सहा प्रवाशांना अँब्युलन्समध्ये उपचार करून सोडण्यात आले आहे. या घटनेमुळे परिसरात काही काळ भीतीचे वातावरण निर्माण झाले होते; मात्र बचाव पथकांच्या तत्परतेमुळे मोठा अनर्थ टळला. तांत्रिक बिघाडामुळे सुमारे पाऊण तास मोनोरेलची सेवा ठप्प होती. त्यानंतर दुसऱ्या मोनोरेलच्या मदतीने टोइंग करीत ही गाडी बाजूला केल्यानंतर सेवा पूर्ववत झाली.