राज्य नाट्य स्पर्धेच्या रकमांत दुपटीने वाढ

राज्य नाट्य स्पर्धेच्या रकमांत दुपटीने वाढ

मुंबई, ता. २१ : सांस्कृतिक कार्य संचालनालयातर्फे घेण्यात येणाऱ्या राज्य नाट्य स्पर्धेच्या पारितोषिकांसह नाट्यनिर्मिती खर्च, तसेच कलाकारांच्या भत्त्यात दुपटीने वाढ करण्याचा निर्णय सांस्कृतिक कार्यमंत्री ॲड. आशीष शेलार यांनी घेतला आहे. याबाबतचा शासन निर्णय गुरुवारी (ता. २१) निर्गमित करण्यात आला.
सांस्कृतिक कार्य संचालनालयाच्या वतीने दरवर्षी महाराष्ट्र राज्य नाट्य स्पर्धेचे आयोजन करण्यात येते. राज्य नाट्य स्पर्धेच्या अंतर्गत हौशी मराठी, हिंदी, संगीत, संस्कृत, बालनाट्य, दिव्यांग बालनाट्य व व्यावसायिक नाट्य स्पर्धांचे आयोजन करण्यात येते. या स्पर्धेत सहभागी झालेल्या संस्था व कलाकारांना रोख रकमेची पारितोषिके प्रदान करण्यात येतात. तसेच स्पर्धेत सहभागी झालेल्या संस्थांना नाटक सादर केल्यानंतर नाट्यनिर्मिती खर्च देण्यात येतो. तसेच नाट्यसंस्थेस मूळ ठिकाणाहून दुसऱ्या केंद्रावर नाटक सादर केल्यास त्या कलाकारांना दैनिक भत्ता देण्यात येतो. गेली अनेक वर्षे राज्य नाट्य स्पर्धेत सहभागी होणाऱ्या संस्था व कलाकारांनी पारितोषिक रकमा, नाट्यनिर्मिती खर्च आणि दैनिक भत्त्यात वाढ करण्याबाबत मागणी केली होती. या मागणीचा सांस्कृतिक कार्यमंत्री ॲड. आशीष शेलार यांनी सकारात्मक निर्णय घेऊन यामध्ये दुपटीने वाढ करण्याबाबत शासन निर्णय निर्गमित केला आहे.
...
६४व्या स्पर्धेपासून लाभ
शासन निर्णयातील पारितोषिक रकमा, नाट्यनिर्मिती खर्च आणि दैनिक भत्ता इत्यादींमधील वाढीव रकमांचा लाभ ३ नोव्हेंबरपासून सुरू होणाऱ्या ६४व्या महाराष्ट्र राज्य नाट्य स्पर्धेपासून लागू होणार आहेत.