राज्यात ३४५ ठिकाणी पाळणाघर योजना

राज्यात ३४५ ठिकाणी पाळणाघर योजना
नोकरदार महिलांसाठी सुविधा; मंत्री आदिती तटकरे यांची माहिती

सकाळ वृत्तसेवा
मुंबई, ता. २५ : राज्यात सुमारे पाच लाखांहून अधिक नोकरदार महिला आहेत. यामधील मातांना आपल्या मुलांची योग्य काळजी घेता यावी, यासाठी केंद्र सरकारच्या मिशन शक्तीअंतर्गत राज्यात ३४५ ठिकाणी सहा महिने ते सहा वर्षे वयोगटातील मुलांसाठी ‘पाळणाघर’ ही योजना सुरू करण्याचा निर्णय राज्य सरकारने घेतला आहे. या निर्णयामुळे मुलांच्या संगोपनासाठी सुरक्षित व दर्जेदार सुविधा उपलब्ध होणार असल्याची माहिती महिला व बालविकास मंत्री आदिती तटकरे यांनी दिली.

महाराष्ट्रात पहिल्या टप्प्यात ३४५ ठिकाणी ही पाळणाघरे सुरू करण्यास मान्यता देण्यात आली आहे. पाळणाघरांमध्ये डे-केअर सुविधा, पूर्व शालेय शिक्षण, पूरक पोषण आहार, बालकांच्या वाढीचे निरीक्षण, आरोग्य तपासणी, लसीकरण आदी सुविधा पुरविल्या जाणार आहेत. तसेच मुलांना दिवसातून तीन वेळा म्हणजेच सकाळचा नाश्ता, दुपारचे जेवण आणि सायंकाळचा नाश्ता देण्यात येईल. पाळणाघर महिन्यात २६ दिवस आणि दररोज साडेसात तास सुरू राहील. यामध्ये जास्तीत जास्त २५ मुले असतील. या ठिकाणी एक पाळणासेविका व एक पाळणा मदतनीस नेमण्यात येणार आहेत. या पाळणाघरांना वीज, पिण्याचे पाणी, बालकांसाठी विशेष शौचालय यांसारख्या सुविधा पुरविल्या जाणार आहेत.

सरकारकडून प्रतिमाह भत्ता
मिशन शक्तीअंतर्गत उभारण्यात आलेल्या पाळणाघरांना सेवा देणाऱ्या अंगणवाडीसेविकांना १,५०० प्रतिमाह भत्ता देण्यात येणार आहे. अंगणवाडी मदतनीसांना ७५९ प्रतिमाह, पाळणासेविका ५,५०० प्रतिमाह मानधन, तर पाळणा मदतनीस यांना तीन हजार रुपये प्रतिमाह भत्ता देण्यात येणार आहे.