पश्चिम रेल्वेने १५ ठिकाणी हटवली वेगमर्यादा

पश्चिम रेल्वेने १५ ठिकाणी हटवली वेगमर्यादा

लोकल गाड्या धावणार आता अधिक वेगाने

सकाळ वृत्तसेवा
मुंबई, ता. २५ : पश्चिम रेल्वेने गेल्या दोन वर्षांत तब्बल १५ ठिकाणी लोकल गाड्यांवरील वेगमर्यादा हटवली आहे. त्यामुळे या मार्गावरील लोकल आता अधिक वेगाने धावणार असून, प्रवाशांचा वेळ वाचणार आहे.

पश्चिम रेल्वेच्या माहितीनुसार, पूल बांधकाम, दुरुस्ती आणि इतर सुरक्षेच्या कारणास्तव काही मार्गांवर गाड्यांचा वेग मर्यादित करण्यात आला होता; मात्र ही कामे पूर्ण झाल्यानंतर संबंधित ठिकाणी मर्यादा काढून टाकण्यात आल्या आहेत. ग्रँट रोड ते मुंबई सेंट्रलदरम्यान पूल क्रमांक ५ आणि ६१ तसेच कांदिवलीजवळील पूल क्रमांक २० यांचे पुनर्निर्माण करण्यात आले आहे. जुन्या ब्रिटिशकालीन स्क्रू पुलांच्या जागी आधुनिक आरसीसी पूल उभारण्यात आले आहेत. तसेच गोरेगाव ते कांदिवलीदरम्यान सहावी लाइन टाकण्याचे काम पूर्ण झाले आहे. वांद्रा टर्मिनसकडून सुटणाऱ्या मेल-एक्स्प्रेस गाड्यांना पाचव्या आणि सहाव्या मार्गावर वळविण्यात आल्याने मेल-एक्स्प्रेस आणि लोकल गाड्यांच्या वेळापत्रकात सुधारणा झाली आहे. सध्या पश्चिम रेल्वेवरील तब्बल ९५ टक्के गाड्या वेळेत धावत असल्याचे रेल्वे प्रशासनाने स्पष्ट केले.

एप्रिल २०२३ ते मार्च २०२४ दरम्यान हटविलेल्या वेगमर्यादा
खार - सांताक्रूझ : ६० किमी प्रतितास
सांताक्रूझ - विलेपार्ले : ७५ किमी प्रतितास
सांताक्रूझ - खार : ७५ व ६० किमी प्रतितास

एप्रिल २०२४ ते मार्च २०२५ दरम्यान हटविलेल्या वेगमर्यादा
माटुंगा रोड-माहीम (पाचवी लाइन) : १५, ५० व १५ किमी प्रतितास
माहीम - बांद्रा (पाचवी लाइन) : ३० व १० किमी प्रतितास
बांद्रा टर्मिनस - सांताक्रूझ : ४५ व ४५ किमी प्रतितास
अंधेरी यार्ड परिसर : ५० किमी प्रतितास
सांताक्रूझ बांद्रा : ७५ किमी प्रतितास
वांद्रे - माहीम : १५ किमी प्रतितास
जोगेश्वरी- गोरेगाव : ५५ किमी प्रतितास