मेट्रो-१ गणेशोत्सव काळात रात्री एक पर्यंत धावणार

मेट्रो-१ गणेशोत्सव काळात रात्री एकपर्यंत धावणार
मुंबई, ता. २६ : गणेशोत्सवाच्या पार्श्वभूमीवर रात्री उशिरापर्यंत गणपती दर्शनासाठी घराबाहेर पडणाऱ्या भक्तांची गैरसोय होऊ नये, म्हणून मेट्रो-१ने कंबर कसली आहे. त्यानुसार बुधवारपासून ६ सप्टेंबरपर्यंत मध्यरात्री १ वाजेपर्यंत घाटकोपर-वर्सोवा मेट्रो सेवा सुरू राहणार आहे. त्यामुळे गणेशभक्तांना मोठा दिलासा मिळणार आहे. गणेशोत्सवादरम्यान गणरायाच्या दर्शनासाठी मुंबईकर रात्री मोठ्या प्रमाणात बाहेर पडतात; मात्र मेट्रो सेवा नियमित वेळेत बंद होत असल्याने घरी पोहोचताना भक्तांची गैरसोय होते. त्याची दखल मेट्रो-१ने घेऊन घाटकोपर-वर्सोवादरम्यानची मेट्रो सेवा रात्री १२ ऐवजी १ वाजेपर्यंत सुरू ठेवण्याचा निर्णय घेतला आहे. त्यानुसार वर्सोवाहून घाटकोपरसाठी शेवटची मेट्रो १२.१५ वाजता सुटणार आहे, तर घाटकोपरहून वर्सोवासाठी १२.४० वाजता शेवटचे गाडी सुटणार आहे.