सोमय्या रुग्णालयाजवळील पादचारी पूल खचला

सोमय्या रुग्णालयाजवळील पादचारी पूल खचला

मुंबई, ता. २८ : चुनाभट्टी येथे सोमय्या रुग्णालयाकडे जाण्यासाठी मोठ्या नाल्यावर असलेला पादचारी पूल एका बाजूने खचला असून, त्यावरून रहदारी सुरूच आहे. यामुळे या ठिकाणी अपघात होण्याची भीती स्थानिक नागरिक व्यक्त करीत आहेत.
सायनमधील प्रतीक्षानगर भागातून सोमय्या रुग्णालयात जाण्यासाठी मोठा नाला पार करावा लागतो. या नाल्यावर महापालिकेच्या एफ उत्तर विभागाने पादचारी पूल उभारला आहे. या पुलाचा एक भाग खचल्यामुळे तो एका बाजूला कलंडला आहे. भिंती, पिलर व फरशांना भेगा पडल्या असून, काही ठिकाणी चिराही गेल्या आहेत. अपघाताचा धोका लक्षात घेऊन स्थानिकांनी स्वतःहून बांबू व रस्सी-रश्‍य्या लावून पुलाला आधार देण्याचा प्रयत्न केला आहे; मात्र त्यानेही धोका टळलेला नाही. हा पूल बंद पडल्यास प्रतीक्षानगर येथून रुग्णालयात पोहोचण्यासाठी नागरिकांना वडाळामार्गे किंवा सायन महामार्गाने किमान तीन किलोमीटरचा वळसा घालून जावे लागेल. यामुळे आपत्कालीन परिस्थितीत रुग्णांना मोठा त्रास होणार आहे. या घटनेला आठवडा उलटूनही महापालिकेच्या एफ उत्तर विभागाने याची दखल घेतलेली नाही. त्यामुळे पूल कोसळून दुर्घटना होण्याआधी महापालिकेने तातडीने दुरुस्ती करावी, अशी मागणी होत आहे.
.......