आझाद मैदानभोवती पोलिसांचा कडेकोट बंदोबस्त

आझाद मैदानाभोवती पोलिसांचा कडेकोट बंदोबस्त

मुंबई, ता. २८ : सकल मराठा आरक्षणाच्या मागणीसाठी होणाऱ्या आंदोलनाच्या पार्श्वभूमीवर गुरुवारी (ता. २८) संध्याकाळपासूनच मुंबई पोलिसांनी आझाद मैदानाभोवती कडेकोट बंदोबस्त तैनात केला आहे. शुक्रवारी प्रत्यक्ष आंदोलनादरम्यान आवश्यकतेनुसार अधिकचे मनुष्यबळ, विशेष तुकड्या तैनात केल्या जातील, असे स्पष्ट करण्यात आले आहे.

पोलिस दलातील वरिष्ठ अधिकाऱ्याने दिलेल्या माहितीनुसार आझाद मैदानाच्या परिघात सुमारे १,५०० अधिकारी, अंमलदार बंदोबस्तासाठी तैनात असतील. याशिवाय सीआयएसएफ, सीआरपीएफ, आरपीएफ, शीघ्र कृती दल आणि अन्य विशेष पथकांनाही तैनात केले जाईल. शहरात गणेशोत्सवासाठी सुमारे २० हजार पोलिस बंदोबस्तासाठी रस्त्यावर आहेत. त्यातील काही मनुष्यबळही वाडीबंदर ते आझाद मैदानादरम्यान तैनात केले जाणार आहे, असे या अधिकाऱ्याने सांगितले. मुंबई पोलिसांनी जरांगे यांना शुक्रवारी एका दिवसासाठी सकाळी दहा ते संध्याकाळी सहा या वेळेत आझाद मैदान येथे आंदोलनासाठी परवानगी दिली आहे. मात्र आझाद मैदानाच्या दिशेने किंवा आझाद मैदान येथून अन्य ठिकाणी मोर्चा काढण्यासाठी पोलिसांची परवानगी नाही. जरांगे यांच्याव्यक्तिरिक्त फक्त चार वाहने थेट आझाद मैदानापर्यंत येतील. उर्वरित आंदोलकांची वाहने वाडीबंदर येथेच थांबली जातील आणि शेजारील परिसरात उपलब्ध करून देण्यात आलेल्या वाहनतळाकडे मार्गस्थ होतील, अशा अटी पोलिसांनी परवानगी पत्रात नमूद केल्या आहेत.

दरम्यान, गुरुवारी सकाळपासूनच आंदोलक मुंबईत दाखल होत आहेत. संध्याकाळी हे प्रमाण वाढले. आझाद मैदान येथील आंदोलनासाठी राखीव जागेची मर्यादा एकूण पाच हजार व्यक्ती सामावून घेण्याची असली तरी आंदोलनाला त्यापेक्षा जास्त गर्दी होईल, असा पोलिसांचा अंदाज आहे. त्यानुसार बंदोबस्ताचे नियोजन केल्याचे वरिष्ठ अधिकाऱ्याने सांगितले.