‘सीएसएमटी’समोर रास्ता रोको

‘सीएसएमटी’समोर रास्ता रोको
पोलिसांचा थेट जरांगेंना व्हिडिओ कॉल

मराठा आंदोलकांनी शुक्रवारी दुपारी एक वाजण्याच्या सुमारास सीएसएमटी स्थानकाबाहेर रास्ता रोको केला. त्या सुमारास आझाद मैदान, सीएसएमटी, पालिका मुख्यालयभोवतीचे सारेच मार्ग आंदोलकांनी गजबजून गेले होते आणि चहू बाजूची वाहतूक खोळंबली होती. या वेळी अतिरिक्त पोलिस आयुक्त अभिनव देशमुख आणि उपआयुक्त डॉ. प्रवीण मुंढे यांनी मध्यस्थी करीत आंदोलकांना रस्ता मोकळा करण्यासाठी विनवले. आंदोलक मात्र ठाम होते. आंदोलक रस्त्यावरून हटत नाहीत, हे पाहिल्यावर बळाचा वापर न करता उपआयुक्त मुंढे यांनी थेट मनोज जरांगे पाटील यांना व्हिडिओ कॉल करून परिस्थिती सांगितली. तेव्हा जरांगे यांनीही आंदोलकांना रस्ता मोकळा करण्याची सूचना केली. मात्र त्यानंतरही आंदोलक रस्ता मोकळा करण्यास राजी होत नव्हते. अखेर उपआयुक्त मुंढे यांनी तुम्ही दादांची (जरांगे) सूचना ऐकणार नाही का, असा सवाल करताच आंदोलकांनी रस्ता मोकळा केला. तत्पूर्वी उपआयुक्त मुंढे यांच्या कार्यालयाबाहेरही ५० ते ६० आंदोलकांनी रस्ता अडवण्याचा प्रयत्न केला. समन्वयक आणि पोलिसांच्या मध्यस्थीने आंदोलकांनी रस्ता मोकळा केला.

समन्वयकांची दमछाक
आंदोलकांमध्ये समन्वय साधण्यासाठी प्रत्येक समूहामधून एका व्यक्तीची समन्वयक म्हणून नियुक्ती करण्यात आली होती. वाहतुकीस, वर्दळीस अडथळा झाल्यास बंदोबस्तावरील पोलिस व संबंधित आंदोलकांशी संवाद साधण्यात समन्वयकांची दमछाक झाल्याचे पाहायला मिळाले.

थेट ट्रॅक्टर घेऊन आझाद मैदानात
- जरांगे यांच्यासह फक्त पाच वाहने आझाद मैदान परिसरात जातील, या पोलिसांच्या अटीला आंदोलकांनी हरताळ फासला. धाराशिव येथील रहिवासी दीपक पाटील आपल्या ट्रॅक्टरवरून आझाद मैदानात आले. पाटील यांच्याव्यतिरिक्त आंदोलकांची अनेक वाहने आझाद मैदान परिसरात येऊन धडकली.