गिरगांवच्या राजाचा जगातील सर्वात भव्य महाराष्ट्रीयन फेटा!

गिरगावच्या राजाचा जगातील सर्वात भव्य महाराष्ट्रीयन फेटा!
‘वर्ल्ड रेकॉर्ड बुक ऑफ इंडिया’मध्ये नोंद
सकाळ वृत्तसेवा
मुंबई, ता. ३० : गणेशोत्सवाच्या उत्साही वातावरणात निकदवरी लेन सार्वजनिक श्री गणेशोत्सव मंडळ गिरगावचा राजा यांनी पुन्हा एकदा इतिहास रचला आहे. याआधी जगातील सर्वात उंच शाडू मातीच्या गणेशमूर्तीची नोंद आपल्या नावावर करणाऱ्या या मंडळाने यंदा जगातील सर्वात उंच व जड पारंपरिक महाराष्ट्रीयन फेटा साकारून आपले नाव ‘वर्ल्ड रेकॉर्ड बुक ऑफ इंडिया’मध्ये नोंदवले आहे.
हा विक्रमी फेटा तब्बल सहा फूट उंच, १५ फूट व्यासाचा आणि जवळपास २०० किलो वजनाचा आहे. पारंपरिक वस्त्रसामग्रीचा वापर करून त्याची भव्य रचना करण्यात आली. महाराष्ट्राच्या संस्कृती, परंपरा आणि अभिमानाचा संगम या फेट्यातून ठळकपणे दिसून येतो.
गिरगावच्या राजा मंडळाचे अध्यक्ष गणेश लिंगायत यांनी सांगितले, की गिरगावचा राजा हा केवळ गणेशोत्सवाचा गजर नाही, तर महाराष्ट्राच्या संस्कृतीचा जिवंत दर्पण आहे. हा फेटा आपल्या परंपरेला अर्पण केलेला आदर असून आम्हाला याचा अभिमान वाटतो.
या सोहळ्याला वर्ल्ड रेकॉर्ड बुक ऑफ इंडियाच्या मुख्य संपादक सुषमा नार्वेकर या विशेष उपस्थित होत्या. त्यांनी अधिकृत नोंद जाहीर करून मंडळाचे अभिनंदन केले. हजारो भाविकांच्या उपस्थितीत या भव्य फेट्याचे अनावरण झाले आणि गणेशोत्सवाच्या जल्लोषात आणखी एक ऐतिहासिक क्षण कोरला गेला.