महालक्ष्मी गेली, आता गणेश विसर्जनाला जाणार

महालक्ष्मी गेली, आता
गणेश विसर्जनाला जाणार
आंदोलनानंतर परतणाऱ्या आंदोलकांची भावना
सकाळ वृत्तसेवा
मुंबई, ता. २ ः हिंगोलीच्या वसमत तालुक्यातील रायवाडी हे सहाशे लोकवस्तीचे गाव. गावातील प्रत्येक कुटुंबातून एक व्यक्ती मराठा आंदोलनासाठी मुंबईत दाखल झाला आहे. यंदा पहिल्यांदाच घरातील महालक्ष्मीच्या पूजेला हजर राहता आले नाही, याची खंत त्यांच्या बोलण्यातून व्यक्त होती; मात्र आंदोलन यशस्वी झाल्यामुळे किमान गणपती विसर्जनाला घरी जायला मिळेल, याचे समाधान त्यांच्या चेहऱ्यावर दिसत होते.
राजाराम जमदाडे हे मनोज जरांगे पाटील यांच्या ताफ्यासोबत मुंबई आंदोलनासाठी दाखल झाले होते. ते सध्या वाशीच्या सिडको प्रदर्शन केंद्रात मुक्कामी आहेत. त्यांच्यासोबत गावातील ५० लोक आले आहेत. राजाराम यांच्या अंगावर गेल्या पाच दिवसांपासून एकच शर्ट आहे. आम्ही मुंबईत मजा करीत असल्याची टीका होते; पण घरदार सोडून मुंबईत येण्याची आम्हाला कुठलीही हौस नसल्याचे राजाराम यांनी सांगितले.
....
शेतातील पीक सोडून मुंबईला येण्याचा आम्हाला काही शौक नाही. या वेळी घरच्या महालक्ष्मीला आम्ही जाऊ शकलो नाही. आरक्षणाचा लढा यशस्वी झाल्याचे समाधान घेऊन जातोय.
- संतोष जमदाडे, रायवाडी
----
मुंबईत आरक्षणाच्या आंदोलनासाठी आलो आहे. पाच दिवस आंघोळ नसल्याने त्रास होत आहे. आता किमान घरच्या गणेश विसर्जनासाठी जाता येईल, याचे समाधान आहे.
- नवनाथ बेंडे, पळशी, हिंगोली