सीएसएमटी चौकात आंदोलकांचा आनंदोत्सव

सीएसएमटी चौकात आंदोलकांचा आनंदोत्सव

सकाळ वृत्तसेवा
मुंबई, ता. २ : सरकारने जीआर काढून मराठा आरक्षणाच्या मागण्या मान्य केल्यानंतर मुंबईतील सीएसएमटी चौकात आज मराठा आंदोलकांनी विजयी जल्लोष केला. गुलाल उधळत, ढोल-ताशांच्या गजरात आणि शिट्यांच्या आवाजात परिसर ‘एक मराठा, लाख मराठा’ घोषणांनी दणाणून गेला. ‘कोण म्हणतं देणार नाय, घेतल्याशिवाय राहणार नाय’, ‘पाटील, पाटील, पाटील’ अशा घोषणा देत शेकडो आंदोलकांनी उत्साह व्यक्त केला.
मनोज जरांगे पाटील यांनी उपोषण सोडल्यानंतर आंदोलकांचा आनंद गगनात मावेनासा झाला. दोन ते तीन तास सीएसएमटीसमोर आंदोलकांनी आंनदोत्सव साजरा केला. तरुण, महिला आणि वयोवृद्ध आंदोलकांनी गुलालाची उधळण करत विजयाच्या आरोळ्या दिल्या. शिट्यांचा, ढोल-ताशांचा गजर आणि नाचगाण्याने संपूर्ण परिसर दणाणून गेला होता. आंदोलनाच्या दडपणामुळे सरकारला झुकावे लागले, याचा आनंद व्यक्त करीत आंदोलकांनी ‘ही फक्त सुरुवात आहे, आता हक्कासाठी लढा सुरू राहील,’ असेही सांगितले. या वेळी मोठ्या प्रमाणावर फटाक्यांची आतषबाजीही करण्यात आली.
...
आज आमच्या डोळ्यातील पाणी आणि संघर्षाचे रूपांतर आनंदात झाले. गुलाल उधळताना असे वाटलं की खऱ्या अर्थाने लढा सफल झाला.
- रोहित खापे, भाटशिवपुरा, धाराशिव
...
सरकारनं जीआर काढला ही आमच्यासाठी विजयाची घोषणा आहे. ढोल-ताशांच्या तालावर आम्ही जल्लोष केला. हा क्षण आयुष्यभर लक्षात राहील.
- शरद रीतपुरे, धाराशिव
...
सरकारने दबावाखाली निर्णय घेतला; पण ही आमची ताकद आहे. आज शिट्या वाजवत, घोषणाबाजी करीत आम्ही दाखवून दिले की मराठा लढा अजून जोमाने सुरू राहील.
- कार्तिक नाईकनवरे, सावरगाव, बीड