सातव्या दिवशी चार हजार गणेश-गौरींचे विसर्जन

सातव्या दिवशी चार हजार गणेश-गौरींचे विसर्जन

सकाळ वृत्तसेवा
मुंबई, ता. २ : मुंबईत गणेशोत्सवाच्या सातव्या दिवशी मंगळवारी (ता. २) मोठ्या उत्साहात गणेश व गौरींचे विसर्जन पार पडले. संध्याकाळपर्यंत एकूण चार हजार ९९ मूर्तींचे विसर्जन करण्यात आले असून कोणताही अनुचित प्रकार घडलेला नाही, अशी माहिती महापालिका प्रशासनाने दिली.
महापालिकेकडून मिळालेल्या माहितीनुसार, आजपर्यंत सार्वजनिक २७, घरगुती ३,५५२ आणि गौरी ५२० अशी एकूण ४,०९९ मूर्तींचे विसर्जन करण्यात आले. आज गौरींसोबत गणेशमूर्तींचे विसर्जन करण्यात येत असल्याने सर्वाधिक विसर्जन आजच्या दिवशी होत असते. शहरातील विविध कृत्रिम तलावांसह समुद्रकिनाऱ्यांवर मोठ्या संख्येने भाविकांनी गर्दी केली होती. पोलिस, महापालिका तसेच स्वयंसेवी संस्थांनी सुरक्षा आणि स्वच्छतेची विशेष खबरदारी घेतली. त्यामुळे विसर्जन सुरळीत पार पडले. रात्री उशिरापर्यंत विसर्जन सुरू होते.