अर्जविक्रीतून म्हाडाची साडेसहा कोटींची कमाई!

अर्जविक्रीतून म्हाडाची साडेसहा कोटींची कमाई!
कोकण मंडळासाठी सव्वा लाख अर्ज; आणखी नऊ दिवस बाकी
बापू सुळे ः सकाळ वृत्तसेवा
मुंबई, ता. ३ : सर्वसामान्यांच्या घराचे स्वप्न पूर्ण करण्यासाठी म्हाडाच्या कोकण मंडळाने काढलेल्या लॉटरीच्या अर्जविक्रीतून म्हाडा मालामाल झाले आहे. गेल्या दीड महिन्यांत तब्बल एक लाख २६ हजारांहून अधिक नागरिकांनी म्हाडाच्या घरासाठी अनामत रकमेसह ऑनलाइन अर्ज भरले आहेत. त्यानुसार प्रत्येक अर्जामागे म्हाडाला ५०० रुपये मिळत आहेत. केवळ अर्जाच्या माध्यमातून म्हाडाची सहा कोटी ३१ लाख रुपयांची कमाई झाली आहे. अर्ज भरण्याची अंतिम मुदत १२ सप्टेंबर असल्याने ही रक्कम आणखी वाढण्याची शक्यता आहे.
म्हाडाच्या कोकण मंडळातर्फे विविध गृहनिर्माण योजनेअंतर्गत उभारलेल्या ५,२८५ सदनिका आणि ७७ भूखंडांच्या विक्रीकरिता जुलै महिन्यात लॉटरी काढण्यात आली. १४ जुलैपासून ऑनलाइन अर्ज भरण्यास सुरुवात झाली. सुरुवातीला कमी प्रतिसाद मिळाल्याने म्हाडाने दोनवेळा मुदतवाढ दिली. त्यानुसार आता १२ सप्टेंबरपर्यंत इच्छुकांना अर्ज करता येणार आहे. दरम्यान, आज दुपारपर्यंतच्या आकडेवारीनुसार, एक लाख ५९ हजार ४८२ लोकांनी घरासाठी अर्ज केला आहे, तर एक लाख २६ हजार २२४ जणांनी अनामत रक्कम भरली आहे. ही अनामत रक्कम लॉटरी निघाल्यानंतर संबंधितांना परत केली जाणार असली, तरी अर्जाचे ५०० रुपये म्हाडाला मिळणार आहेत. त्यामुळे केवळ अर्जविक्रीतून म्हाडाला सहा कोटी ३१ लाख रुपयांची कमाई झाली आहे.
------
सरकारला १.१३ कोटींचा जीएसटी
म्हाडाच्या ५०० रुपये शुल्कावर १८ टक्के जीएसटी लावला जात आहे. त्यामुळे प्रत्येक अर्जामागे सरकारला ९० रुपये मिळत आहेत. त्यामुळे म्हाडाप्रमाणेच केंद्र आणि राज्य सरकारला जीएसटीपोटी संबंधित अर्जदारांकडून एक कोटी १३ लाख रुपयांची कमाई झाली आहे.
------
अत्यल्प, अल्प गटामुळे अर्जाचा पाऊस
कोकण मंडळाच्या लॉटरीतील घरे अत्यल्प आणि अल्प उत्पन्न गटातील असून, त्याची किंमत १२ ते ५० लाखांपर्यंत आहेत. त्यामुळे सर्वसामान्य मध्यमवर्गीयांकडून लॉटरीसाठी मोठ्या प्रमाणात अर्ज आले आहेत.
-----
अनामत रकमेपोटी ९६ कोटी
म्हाडाच्या घरासाठी अत्यल्प उत्पन्न गटासाठी पाच हजार रुपये, तर अल्प उत्पन्न गटासाठी १० हजार रुपये अनामत रक्कम आहे. सध्या आलेल्या एकूण अर्जापैकी ५० टक्के अर्ज अत्यल्प, तर ५० टक्के अर्ज अल्प उत्पन्न गटासाठी गृहीत धरले, तरी अनुक्रमे ६४ कोटी आणि ३२ कोटी रुपये रक्कम अनामत रकमेपोटी म्हाडाकडे जमा झाली असेल, असे म्हाडाच्या एका वरिष्ठ अधिकाऱ्याने सांगितले.
----
म्हाडाची कमाई
आतापर्यंतचे एकूण अर्ज - १,५९,४८२
अनामत रक्कम भरलेले अर्ज - १,२६,२२४
अर्जविक्रीतून मिळालेली रक्कम - ६.३१ कोटी
जीएसटीची रक्कम - १.१३ कोटी
अनामत रक्कम - ९६ कोटी