शांततेत आंदोलन करणे गुन्हा आहे का?

शांततेत आंदोलन करणे गुन्हा आहे का?
आझाद मैदानावरील आंदोलकांचा सवाल

नितीन बिनेकर ः सकाळ वृत्तसेवा
मुंबई, ता. ३ : मराठा आरक्षणाच्या मागणीसाठी गेले पाच दिवस आझाद मैदान हजारो आंदोलकांमुळे गजबजून गेले, पण या गर्दीत गेल्या अनेक वर्षांपासून न्यायासाठी आझाद मैदानावर ठाण मांडून बसलेल्या जुन्या आंदोलकांचे हाल झाले. ‘मराठ्यांना पाच दिवसांत न्याय, मग वर्षानुवर्षे आम्हाला न्यायापासून वंचित का ठेवले, शांततेत आंदोलन करणे गुन्हा आहे का,’ असा संतप्त सवाल या आंदोलकांनी उपस्थित केला.
महात्मा फुले मागासवर्गीय विकास महामंडळात २००१ ते २०१८ दरम्यान झालेल्या प्रचंड भ्रष्टाचाराविरोधात चौकशी समिती स्थापन करण्यासाठी मधुकर रगडे २०२१ पासून आझाद मैदानावर बसले आहेत. ‘गेल्या चार वर्षांपासून आमच्या आंदोलनाची सरकारने साधी दखल घेतली नाही, मात्र नियमांचे उल्लंघन करणाऱ्या आंदोलनासाठी सरकार धावून आले. शांततामय लढे उभारणे हा आमचा गुन्हा आहे का,’ असा सवाल मधुकर रगडे यांनी केला.
मधुकर रगडे यांच्याप्रमाणे आझाद मैदानावर कुणी दोन वर्षांपासून, तर कुणी तीन-चार वर्षांपासून न्यायासाठी लढा देत आहेत; पण सरकारकडून आम्हाला कोणताही प्रतिसाद मिळत नाही, अशी या सर्वांची तक्रार आहे. मराठा आंदोलकांच्या गर्दीमुळे मैदानातील इतर जुन्या आंदोलनांचे तंबू हलवावे लागले. अन्न, पाणी, शौचालयासारख्या मूलभूत सोयींवर ताण आला. ‘आम्ही रोज जगण्यासाठी संघर्ष करतो. तरी आमच्या मागण्या थंडगार बस्त्यात पडून आहेत. आझाद मैदानावर वर्षानुवर्षे सुरू असलेली आंदोलने मराठा आरक्षणाच्या गर्दीत कोपऱ्यात ढकलली गेली,’ असे त्यांनी सांगितले.
...
पोलिसांच्या २५ अटी-शर्तींच्या चौकटीत राहून मी २४ दिवसांपासून आझाद मैदानावर आंदोलन करतोय; पण आमची दखल घेणारा कोणी नाही.
- प्रकाश नामदेव अहिरे, आंदोलक
...
शासनाच्या विविध योजनांतील भ्रष्टाचाराविरोधात मी १५ दिवसांपासून आंदोलन करतोय; पण सरकार बहिरे झाले आहे.
-लक्ष्मण खरात, जालना
...
वाळुमाफियांनी माझ्या मुलाची हत्या केली. गुन्हेगार अजूनही मोकाट आहे. एसआयटीच्या मागणीसाठी अनेक दिवसांपासून आंदोलनात बसलोय. मराठा आंदोलकांसाठी सरकार धावते, मग आमच्यासाठी का नाही?
- वैशाली पिंपळे, आंदोलक, शिर्डी
...
कोळी महादेव, कोळी मल्हार, कोळी ढोर, टोकरे कोळी, डोंगर कोळी या जमातींना प्रमाणपत्र मिळणे कठीण झाले आहे. १९५०पूर्वीची कोळी नोंद पुरावा मानून तातडीने निर्णय घ्यावा. मराठा आंदोलनाला जलद न्याय द्या. आमच्या प्रश्नांवर सरकार गप्प का?
- गीतांजली कोळी, सामाजिक कार्यकर्ती, धुळे