१० थराची विश्वविक्रमात नोंद

१० थरांची विश्वविक्रमात नोंद
कोकणनगर गोविंदा पथकाचा पराक्रम
सकाळ वृत्तसेवा
मुंबई, ता. ४ : ठाण्यातील संस्कृती युवा प्रतिष्ठानद्वारे आयोजित दहीहंडी सोहळ्याने महाराष्ट्राचा झेंडा जागतिक पातळीवर फडकावला आहे. तब्बल १३ वर्षांपूर्वी या दहीहंडी सोहळ्याने गिनीज वर्ल्ड रेकॉर्डमध्ये नोंद केली होती. आता पुन्हा त्याच परंपरेचा जागतिक गौरव वाढवित कोकणनगर गोविंदा पथकाने १० थरांचा मानवी मनोरा उभारून विश्वविक्रम प्रस्थापित केला आहे. श्री सिद्धिविनायकाच्या साक्षीने पार पडलेल्या या कार्यक्रमात गिनीज वर्ल्ड रेकॉर्डचे वरिष्ठ अधिकारी स्वप्नील डांगरकर यांनी मंडळाला अधिकृत प्रमाणपत्र सुपूर्द केले.
कोकणनगर गोविंदा पथक हे १० थरांचा विक्रम नोंदविणारे पहिलेच पथक ठरले आहे. त्यांच्या शिस्तबद्ध सराव, संघभावना, कष्ट आणि जोखीम पत्करण्याच्या तयारीमुळे हे ऐतिहासिक यश शक्य झाले. महाराष्ट्राच्या सांस्कृतिक परंपरेला जागतिक पातळीवर मान्यता मिळवून देण्याचे श्रेय या पथकाला जाते. महाराष्ट्र राज्य दहीहंडी गोविंदा असोसिएशनच्या सातत्यपूर्ण पाठबळ आणि मार्गदर्शनामुळे हे यश मिळाल्याचे पथकाने सांगितले.
---
दहीहंडी ही केवळ परंपरा नाही, तर महाराष्ट्राच्या सांस्कृतिक अस्मितेचे प्रतीक आहे. आजच्या या विक्रमामुळे महाराष्ट्राचे नाव जगभर दुमदुमले आहे. गोविंदांच्या या ऐतिहासिक कामगिरीमागे श्री सिद्धिविनायकाचे आशीर्वाद आहेत.
- पूर्वेश सरनाईक, युवासेना कार्याध्यक्ष