आझाद मैदानावरील आंदोलनं थांबवा; मिलिंद देवरा यांची मुख्यमंत्र्यांकडे मागणी

आझाद मैदानावरील आंदोलने थांबवा!
दक्षिण मुंबई ठप्प करणाऱ्यांवर कारवाईची देवरांची मागणी
सकाळ वृत्तसेवा
मुंबई, ता. ४ : दक्षिण मुंबईत वारंवार होणाऱ्या आंदोलनांमुळे सुरक्षेच्या दृष्टीने धोका निर्माण होत आहे. लोकशाहीत आंदोलनाचा अधिकार असला, तरी त्यामुळे सामान्य जनतेचा श्वास गुदमरू नये. त्यामुळे दक्षिण मुंबईचा परिसर ठप्प करणाऱ्या आंदोलकांवर कारवाई करण्याची मागणी माजी खासदार आणि शिवसेना नेते मिलिंद देवरा यांनी मुख्यमंत्री देवेंद्र फडणवीस यांना लिहिलेल्या पत्रात केली आहे. दरम्यान, देवरा यांच्या पत्रामुळे शिंदेंच्या शिवसेनेचा खरा चेहरा उघड झाल्याची टीका शिवसना ठाकरे गटाचे खासदार संजय राऊत यांनी केली आहे.
मंत्रालय, विधान भवन, महापालिका मुख्यालय, पोलिस आयुक्तालय, नौदल कमांडर, बँका, कॉर्पोरेट मुख्यालय, अशी विविध महत्त्वाची कार्यालये दक्षिण मुंबईत आहे. या परिसरात आंदोलन करणे म्हणजे केवळ जनतेला अडथळा नाही, तर सरकार आणि सुरक्षेवर थेट प्रहार करण्यासारखे आहे. हा प्रकार असह्य आहे. जगातील कोणत्याही देशात मुख्य प्रशासकीय आणि आर्थिक केंद्रबिंदू असलेली शहरे आंदोलने करून ठप्प केली जात नाहीत; पण मुंबईत मात्र आंदोलकांच्या मनमानीला मोकळीक दिली जाते, ही सरकारची गंभीर चूक आहे. सततच्या या आंदोलनांमुळे सर्व व्यवहार ठप्प होत असून त्यांचा परिणाम रोजगारासह आर्थिक व्यवहारांवरदेखील होत असल्याचे देवरा यांनी नमूद केले आहे.
---
सरकार अपयश लपवते!
आझाद मैदान आणि दक्षिण मुंबईतील आंदोलने त्वरित बंद करावीत किंवा बाहेर हलवावीत. आंदोलकांची सोय पाहण्यापेक्षा मुंबईकरांचे जीवन सुरक्षित ठेवणे महत्त्वाचे आहे. राजधानी ठप्प करणाऱ्यांना सरकारने खडसावले नाही, तर सरकार स्वतःचे अपयश लपवत आहे, असा त्याचा अर्थ होईल, असे देवरा म्हणाले.
---
अमित शहा पुरस्कृत शिंदे गटाचा हाच खरा चेहरा आहे. मुंबईत मराठी माणूस त्यांच्या न्याय्य मागण्यांसाठी एकवटल्याची पोटदुखी उघड झाली आहे. त्यांनी बाळासाहेबांचा फोटो वापरणे बंद करावे.
- संजय राऊत, नेते, शिवसेना (उद्धव बाळासाहेब ठाकरे)