‘बीएच’ वाहनधारकांची कर भरण्यास टाळाटाळ

‘बीएच’ वाहनधारकांची
कर भरण्यास टाळाटाळ
परिवहन विभाग आकारणार दंड
सकाळ वृत्तसेवा
मुंबई, ता. ४ : रस्ते वाहतूक आणि महामार्ग मंत्रालयाच्या निर्देशानुसार, भारत (बीएच) मालिकेतील वाहनधारकांना दोन वर्षांनंतर वाहन कर भरणे बंधनकारक आहे; मात्र मुदत संपल्यावरही या मालिकेतील बहुतांश वाहनधारक कर भरण्यास टाळाटाळ करीत असल्याचे निदर्शनास आले आहे. या पार्श्वभूमीवर परिवहन विभागाने कठोर पावले उचलली असून, मुदतीनंतर १०० रुपये दंड आणि जादा विलंब केल्यास अतिरिक्त दंड आकारण्याचा इशारा दिला.
केंद्रीय रस्ते वाहतूक आणि महामार्ग मंत्रालयाच्या अधिसूचनेमुळे, देशभरात ‘बीएच’ मालिकेतील वाहनांची नोंदणी सुलभ झाली आहे. या योजनेअंतर्गत वाहनमालकांना एकाच नोंदणीद्वारे देशभरात वाहन चालवण्याची मुभा मिळते. त्यासाठी दोन वर्षांसाठी एकदाच वाहन कर आकारला जातो. कराची मुदत संपल्यानंतरच्या सात दिवसांनंतर म्हणजे आठव्या दिवसापासून प्रतिदिन १०० रुपये दंड लागू होतो. ‘बीएच’ मालिकेतील वाहनांची दोन वर्षांची कर मुदत संपल्यानंतरही अनेक वाहनमालक कर भरण्यात टाळाटाळ करीत आहेत. यामुळे दंडाच्या रकमेतही मोठी वाढ झाल्याचे आरटीओतील अधिकाऱ्यांनी सांगितले.
===
ऑनलाइन सुविधा उपलब्ध
वाहनमालकांना कर भरण्यासाठी परिवहन विभागाच्या अधिकृत संकेतस्थळावर ऑनलाइन सुविधा उपलब्ध करून देण्यात आली आहे. तसेच, नजीकच्या आरटीओ विभागातही संपर्क साधून कर भरण्याची सुविधा उपलब्ध आहे. त्यामुळे तातडीने कर भरण्याचे आवाहन केले आहे.