दोन अवयवदानाने सात जणांना जीवदान

दोन अवयवदानाने
सात जणांना जीवदान
मुंबई, ता. ७ : मुंबईत दोन वेगवेगळ्या रुग्णालयांत झालेल्या अवयवदानामुळे सात जणांना नवजीवन मिळाले असून, एका व्यक्तीला दृष्टीदान झाले आहे. मुलुंडच्या फोर्टिस रुग्णालयात ४३ वर्षीय व्यक्तीचा ४ सप्टेंबर रोजी मृत्यू झाल्यानंतर कुटुंबीयांनी अवयवदानाचा निर्णय घेतला. त्याचे यकृत आणि मूत्रपिंडे दान करण्यात आले. तसेच डोळ्यांचे कॉर्नियाही दान झाल्याने एका व्यक्तीला दृष्टी मिळाली. दुसऱ्या घटनेत ६ सप्टेंबर रोजी ठाण्याच्या ज्युपिटर रुग्णालयात २९ वर्षीय तरुणाच्या मृत्यूनंतर त्याचे अवयवदान करण्यात आले. त्याची फुप्फुसे, यकृत आणि मूत्रपिंडे दान करण्यात आली. मुंबई विभागातील हे अनुक्रमे ३६ व ३७ वे अवयवदान ठरले आहे.