‘कूपर’मध्ये उंदराचा आणखी एकाला चावा

‘कूपर’मध्ये उंदराचा
आणखी एकाला चावा

सकाळ वृत्तसेवा
मुंबई, ता. ७ : कूपर रुग्णालयात आणखी एका रुग्णाला उंदराने चावा घेतल्याचे उघड झाले आहे. जेहराबी हुसैन अली (वय ३०, रा. जोगेश्वरी) हिच्या पायाला चावा घेतला आहे. या महिन्यात आतापर्यंत तीन घटनांची नोंद झाली आहे, अशी माहिती जुहू पोलिसांनी दिली.
कूपर रुग्णालयाचा अतिरिक्त भार सांभाळणारे अधिष्ठाता डॉ. शैलेश मोहिते यांनी तातडीने बैठक घेऊन रविवारी सुट्टीच्या दिवशी सकाळपासून स्वच्छता मोहीम राबविली. उंदीर पकडण्यासाठी १० पिंजरे, जवळपास ३५ गम पॅड्स लावण्यात आल्याचे सांगण्यात आले.
अधिष्ठाता डॉ. मोहिते म्हणाले की, दिवसभरात २० ते २५ उंदीर सापळ्यात अडकले आहेत. सकाळपासून माजी वैद्यकीय अधीक्षक डॉ. सचिन सोनवणे, नर्सिंगच्या मुख्याध्यापिका डॉ. वैशाली, आणि एएमओ डॉ. साखरकर आणि पेस्ट कंट्रोलच्या कर्मचाऱ्यांनी रुग्णालयाच्या परिसराची पाहणी केली. खुल्या जागा सिमेंट लावून बंद करण्यात आल्या आहेत. पुढील काही दिवस ही स्वच्छता मोहीम राबवण्यात येणार आहे.