जनसुरक्षा विधेयकाविरोधात १० सप्टेंबरला मुंबईत आंदोलन

जनसुरक्षा विधेयकाविरोधात १० सप्टेंबरला आंदोलन

सकाळ वृत्तसेवा
मुंबई, ता. ८ : जनसुरक्षा विधेयक विरोधी संघर्ष समितीच्या वतीने मुंबईत भव्य आंदोलनाची हाक देण्यात आली आहे. येत्या बुधवारी (ता. १०) रोजी दादर येथील छत्रपती शिवाजी महाराज मैदानाजवळील पुतळ्याजवळ संध्याकाळी ४ ते रात्री ८ वाजेपर्यंत हे आंदोलन होणार असून, हा कायदा तातडीने रद्द करण्याची मागणी करण्यात येणार आहे.
ही घोषणा परळ येथे ५ सप्टेंबरला झालेल्या समितीच्या बैठकीत करण्यात आली. या बैठकीचे अध्यक्षस्थान भारतीय कम्युनिस्ट पक्षाचे कॉ. प्रकाश रेड्डी यांनी भूषवले. बैठकीला विविध पक्ष व संघटनांचे प्रतिनिधी उपस्थित होते. त्यामध्ये काँग्रेसचे धनंजय शिंदे, राष्ट्रवादी काँग्रेस (शरद पवार गट)चे रूपेश खांडके, मार्क्सवादी कम्युनिस्ट पक्षाचे कॉ. शैलेंद्र कांबळे व कॉ. एस. के. रेगे, शेतकरी कामगार पक्षाचे कॉ. राजेंद्र कोर्डे, भारतीय कम्युनिस्ट पक्षाचे कॉ. अमिर काझी व कॉ. नाना परब, ‘हम भारत के लोग’चे फिरोज मिठीबोरवाला, भारतीय कम्युनिस्ट पक्ष (माले)चे कॉ. विजय कुलकर्णी, एपीसीआरचे शाकिर शेख व ॲड. इनामदार यांचा समावेश होता. कामगार नेते सचिन अहिर यांनीही या आंदोलनात सहभागाची तयारी दर्शवली आहे. ‘सर्वांनी या लढ्यात सामील व्हावे,’ असे आवाहन संघर्ष समितीने केले आहे.