दसरा मेळाव्यानिमित्त रस्ते वाहतूक बदल

दसरा मेळाव्यानिमित्त रस्ते वाहतुकीत बदल
मुंबई, ता. १ ः शिवाजी पार्कवर शिवसेनेकडून (ठाकरे गट) गुरुवारी (ता. २) आयोजित करण्यात आलेल्या दसरा मेळाव्याची जय्यत तयारी सुरू आहे. या मेळाव्यासाठी मोठ्या प्रमाणावर गर्दी अपेक्षित आहे. त्यामुळे पश्चिम द्रुतगती महामार्ग, पूर्व द्रुतगती महामार्ग आणि आसपासच्या रस्त्यांवर मोठी वाहतूक कोंडी होण्याची शक्यता आहे. त्यामुळे वाहतूक पोलिसांनी या परिसरातील मार्गात बदल केले आहेत. या पार्श्वभूमीवर नागरिकांची गैरसोय, अडथळा व धोका होऊ नये, यासाठी मुंबई वाहतूक पोलिसांनी वाहतूक बंदी व वाहतूक बदलाबाबत अधिसूचना जारी केली आहे. ही अधिसूचना गुरुवारी सकाळी नऊ ते रात्री ११.५५ या वेळेत लागू राहील, असे वाहतूक पोलिस उपायुक्त (मुख्यालय व मध्य विभाग) डॉ. दीपाली थाटे यांनी या अधिसूचनेत नमूद केले आहे. दरम्यान, नागरिकांनी पोलिसांच्या मार्गदर्शनानुसार पर्यायी रस्त्यांचा वापर करून पोलिसांना सहकार्य करावे, असे आवाहन वाहतूक पोलिसांनी केले आहे.