शिल्पा शेट्टीची चार तास चौकशी

शिल्पा शेट्टीची
चार तास चौकशी
मुंबई, ता. ७ ः आर्थिक गुन्हे शाखेने ६० कोटींच्या फसवणूक प्रकरणात अभिनेत्री शिल्पा शेट्टीची चार तास चौकशी केली. या वेळी तिचा जबाबही नोंदवण्यात आला. ही प्रक्रिया गेल्या आठवड्यात शनिवारी शिल्पाच्या निवासस्थानी पार पडल्याचे आर्थिक गुन्हे शाखेच्या अधिकाऱ्याने सांगितले.
खासगी वित्तसंस्थेचे संचालक दीपक कोठारी यांच्या तक्रारीवरून, आर्थिक गुन्हे शाखेने शिल्पा आणि तिचे पती राज कुंद्रा यांच्याविरोधात गुन्हा नोंदवला होता. कोठारी यांनी कुंद्रा दाम्पत्य संचालक असलेल्या बेस्ट डील टीव्ही प्रायव्हेट लिमिटेड कंपनीत ६० कोटी गुंतवले होते. पुढे शिल्पाने संचालकपदाचा राजीनामा दिला. तसेच ही कंपनीही दिवाळखोरीत निघाली. कोठारी यांनी गुंतवलेली रक्कम परत मागितल्यावर मात्र कुंद्रा यांनी टाळाटाळ सुरू केली. दरम्यान, कंपनीचा आर्थिक व्यवहार करण्याची जबाबदारी आपल्याकडे नव्हती. एक सेलिब्रिटी म्हणून या कंपनीसोबत जोडले गेले आणि त्याचे मानधनही मला मिळाले. त्याव्यतिरिक्त कंपनीशी आपला काहीही संबंध नाही, असा दावा शिल्पाने चौकशीदरम्यान केल्याचे अधिकाऱ्याने सांगितले.