चालक, प्रवाशांची लुबाडणूक करू नये!

चालक, प्रवाशांची लुबाडणूक करू नये!
परिवहनमंत्र्यांचे ॲपआधारित कंपन्यांना आवाहन
सकाळ वृत्तसेवा
मुंबई, ता. ७ : ॲपआधारित टॅक्सी, रिक्षा व ई-बाइक सेवा पुरविणाऱ्या कंपन्यांनी प्रवासी व चालकांना केंद्रस्थानी ठेवावे, नफा कमविण्याच्या प्रयत्नात त्यांची आर्थिक लुबाडणूक करू नये, असे आवाहन परिवहनमंत्री प्रताप सरनाईक यांनी केले. मंत्रालयात आयोजित इंडियन फेडरेशन ऑफ ॲप-बेस ट्रान्सपोर्ट वर्कर्स युनियनच्या बैठकीत ते बोलत होते. या वेळी परिवहन राज्यमंत्री माधुरी मिसाळ, आयुक्त विवेक भीमनवार, सह सचिव राजेंद्र होळकर यांच्यासह युनियनचे अध्यक्ष प्रशांत सावर्डेकर उपस्थित होते.
ॲपआधारित टॅक्सी, रिक्षा व ई-बाइक टॅक्सी सेवा पुरविणाऱ्या कंपन्यांच्या संदर्भात प्रवासी व चालकांकडून आम्हाला अनेक तक्रारी प्राप्त झाल्या आहेत. काही कंपन्या नफेखोरीसाठी प्रवासी व चालकांची आर्थिक लुबाडणूक करीत आहेत. निश्चित नियमावली तयार करून वाजवी भाडे आकारणे तसेच उत्पन्नातील ८० टक्के परतावा चालकांना देणे, अशा सुधारणांचा समावेश असलेले नवे धोरण दोन दिवसांत जाहीर होईल. त्यामुळे ॲपआधारित कंपन्यांवर सरकारचा अंकुश राहील. तसेच प्रवासी आणि चालकांना न्याय मिळेल. राज्यातील बेरोजगार तरुण-तरुणींना रोजगाराच्या संधी निर्माण करण्यासाठी सर्व नियमावली एकाच छताखाली आणण्याचा प्रयत्न आहे. त्यातून प्रवाशांना जास्तीत जास्त चांगल्या सुविधा देण्यासह चालकांच्या हक्काचे संरक्षण करण्याचा प्रयत्न केला जाईल, असेही मंत्री सरनाईक यांनी सांगितले.