सलीम डोलासह छोटा शकीलचा भावाचा शोध सुरू

सलीम डोलासह छोटा शकीलच्या भावाचा शोध सुरू
अपहरण प्रकरणात आरोपपत्र दाखल
सकाळ वृत्तसेवा
मुंबई, ता. ९ ः रासायनिक अमली पदार्थांचे (एमडी) उत्पादन, वाहतूक, विक्री, तस्करीत सक्रिय सलीम डोलासह कुख्यात छोटा शकीलचा भाऊ अन्वर शेखचा गुन्हे शाखेने शोध सुरू केला आहे. जून महिन्यात अमली पदार्थांच्या व्यवहारातून घडलेल्या अपहरणनाट्यात गुन्हे शाखेने गुरुवारी विशेष मोक्का न्यायालयात आरोपपत्र दाखल केले. त्यात डोला, अन्वरसह पाच जण आरोपी फरार असल्याचे नमूद आहे.
शब्बीर सिद्दिकी नामक व्यक्ती या प्रकरणात तक्रारदार आहे. अन्वरचा साथीदार सरवर खानने साजिद इलेक्ट्रिकवाला या व्यक्तीस एमडी उत्पादनासाठी ५० लाख दिले होते. हा व्यवहार सिद्दिकीसमक्ष घडला; मात्र सहा महिने लोटले तरी साजिदने एमडी किंवा पैसे परत न केल्याने सरवरने जून महिन्यात सिद्दिकी व साजिदचे अंधेरीतील एका हॉटेलमधून अपहरण केले. या दोघांना नेरूळ येथे डांबून ठेवले होते. दरम्यान, सिद्दिकीने स्वतःची सुटका करून घेत ओशिवरा पोलिस ठाण्यात तक्रार दिली. पुढे या प्रकरणाचा तपास गुन्हे शाखेकडे वर्ग करण्यात आला. प्रभारी निरीक्षक सदानंद येरेकर, शामराव पाटील यांच्या पथकाने १४ आरोपींना अटक केली होती.