डोंगरीतून ४२ लाखांची रोकड जप्त

डोंगरीतून ४२ लाखांची रोकड जप्त
अमली पदार्थ तस्कर फैजल शेखच्या ठिकाणावर ईडीची कारवाई

मुंबई, ता. १० ः चेन्नईच्या कारागृहात प्रतिबंधात्मक कोठडीत असलेला अमली पदार्थतस्कर फैजल शेख याच्या डोंगरी येथील ठिकाणावरून ४२ लाखांची रोकड, दोन बीएमडब्ल्यूसह तीन आलिशान वापरत्या कार, डिजिटल संसाधने, मालमत्तेशी संबंधित कागदपत्रे जप्त करण्यात आल्याची माहिती सक्तवसुली संचालनालयाच्या (ईडी) प्रवक्त्याने शुक्रवारी (ता. १०) दिली.

ईडीने डोंगरीसह फैजलशी संबंधित शहरातील आठ ठिकाणांवर बुधवारी (ता. ८) छापे घातले होते. डोंगरी येथे फैजलच्या भावाच्या घरातून हा मुद्देमाल जप्त करण्यात आला, असे सांगण्यात आले. यासोबत ईडीने एक बँक लॉकर आणि काही बँक खातीही गोठवली आहेत. फैजलला २०२३मध्ये केंद्रीय अमली पदार्थविरोधी पथकाने (एनसीबी) तर पुढे मुंबई गुन्हे शाखेने अटक केली होती. गुन्हे शाखेने फैजलविरोधात मोक्कानुसार गुन्हा नोंदवला. तो आर्थर रोड मध्यवर्ती कारागृहात बंद होता; मात्र कारागृहातून तो त्याची अमली पदार्थांची तस्करी, विक्री, साठवणूक करणारी संघटित टोळी नियंत्रित करत असे. अटक होऊनही त्याची गुन्हेगारी सुरूच होती. त्यामुळे एनसीबीने प्रतिबंधात्मक कोठडीसाठी परवानगी घेऊन त्याला चेन्नई येथील कारागृहात धाडले. या कोठडीत त्याला किमान एक वर्ष काढावे लागेल. फैजल कुख्यात तस्कर सलीम डोला याच्याकडून अमली पदार्थ विकत घेत होता. या अमली पदार्थांच्या विक्रीतून आलेल्या रक्कमेचा विनियोग फैजलने कसा केला, याचा सुगावा लावण्यासाठी बुधवारी हे छापे घालण्यात आल्याचे ईडी प्रवक्त्याने सांगितले.