शिवडीत भरदिवसा बंदुकीच्या धाकात २.२९ कोटींची लुटमार

शिवडीत भरदिवसा बंदुकीच्या धाकात २.२९ कोटींची लूटमार
मुंबई : शिवडी न्यायालयाजवळ सोमवारी (ता. १३) दुपारी एका सराफा कंपनीचे दागिने घेऊन जाणाऱ्या दोन कर्मचाऱ्यांना बंदुकीचा धाक दाखवत लुटण्यात आले. दुचाकीवरून पाठलाग करणाऱ्या दोन आरोपींनी या कर्मचाऱ्यांकडून कंपनीचे तब्बल २.२९ कोटी रुपयांचे सोन्याचे दागिने हिसकावून पळ काढला. याप्रकरणी रफी अहमद किडवई मार्ग पोलिसांनी आरोपींविरोधात गुन्हा नोंदवून तपास सुरू केला आहे. दिवसाढवळ्या घडलेली ही घटना गांभीर्याने घेत गुन्हे शाखेनेही समांतर तपास सुरू केल्याचे समजते; मात्र आरोपींनी हेल्मेट घालून लूटमार केल्याने त्यांची ओळख पटविणे पोलिसांसमोरील मोठे आव्हान असेल. सोन्याचे दागिने बनविणाऱ्या मास्टरचेन अँड ज्वेल्स या कंपनीचे हे दागिने होते. या कंपनीत तयार झालेले दागिने हॉलमार्कसाठी क्वालिटी अस्साय अँड हॉलमार्क एलएलपी या शिवडीतील कंपनीकडे दिले जातात. मास्टरचेनचे दोन कर्मचारी सोमवारी दुपारी हॉलमार्क झालेले दागिने दुचाकीवरून कंपनी कार्यालयात घेऊन निघाले होते. या वेळी पाठलाग करणाऱ्या आरोपींनी दोनदा त्यांच्या दुचाकीला धडक दिली. दुसऱ्या वेळेस कंपनी कर्मचारी शिवडी न्यायालयाजवळ थांबले. इतक्यात आरोपींपैकी एकाने बंदुकीचा धाक दाखवून त्यांच्याकडील दागिन्यांची बॅग हिसकावून पळ काढला.