बाईक टॅक्सी ॲग्रीगेटर धोरणाचे संघटनेकडून स्वागत

बाइक टॅक्सी ॲग्रीगेटर
धोरणाचे संघटनेकडून स्वागत
मुंबई, ता. २० : राज्य सरकारने नुकतेच जाहीर केलेल्या बाइक टॅक्सी धोरणाचे संघटनांकडून स्वागत झाले असून, त्यामुळे प्रवाशांना सोयीस्कर प्रवासाचा लाभ मिळेल आणि तरुणांना सन्मानजनक रोजगार संधी उपलब्ध होईल, असे संघटनेचे म्हणणे आहे.
बाइक टॅक्सी हे शहरांमधील सर्वात किफायतशीर शेअर मोबिलिटी साधन मानले जाते. कारण ते रिक्षाच्या तुलनेत ४० टक्के आणि कॅबच्या तुलनेत ५६ टक्के स्वस्त असून, यामुळे प्रवाशांना जलद सेवादेखील मिळते. तरुण तसेच महिला चालकांसाठीदेखील ही सेवा सन्मानजनक उत्पन्नाचे साधन आहे. या कामगारांना यातून दरमहा ३५ हजार रुपयांपर्यंत उत्पन्न मिळू शकते, असा संघटनांचा अंदाज आहे. या धोरणाला काही हितसंबंधितांनी विरोध केला असला तरी धोरणकर्त्यांनी हा विरोध बाजूला सारून नागरिकांच्या हिताला प्राधान्य द्यावे, अशी मागणी बाइक टॅक्सी वेल्फेअर असोसिएशन (महिला विभाग) अध्यक्ष सोनाली शिंदे यांनी केली. या धोरणामुळे रोजगारनिर्मिती होईलच आणि नागरिकांना परवडणारी आणि जलद प्रवास सेवा उपलब्ध होईल, असे बाइक टॅक्सी वेल्फेअर असोसिएशनच्या पुरुष विभागाचे राज्य अध्यक्ष कुणाल मोरे म्हणाले.