कोट्यवधींचा पोस्ट तिकीट घोटाळा उघड

कोट्यवधींचा पोस्ट तिकीट घोटाळा उघड
मुंबई, दिल्ली, बिहारमधून त्रिकूट अटकेत

मुंबई, ता. २१ : माता रमाबाई आंबेडकर मार्ग पोलिसांनी मुंबई, दिल्ली आणि बिहारच्या समस्तीपूरहून तिघांना अटक करत देशभर पसरलेला पोस्ट तिकिटांचा काळाबाजार उद्ध्वस्त केला. पोलिसांनी आरोपींच्या बँक खात्यांची तपासणी केली असता त्यात तब्बल आठ कोटींचे व्यवहार आढळले आहेत.

राकेश बिंद (वय ४२), शमशुद्दीन गफ्फार अहमद (वय ३५) आणि शाहिद रझा (वय ३५) अशी अटक आरोपींची नावे आहेत. यातील बिंद मुंबईचा रहिवासी असून, त्याला सायन कोळीवाड्यातून अटक करण्यात आली. तो पोस्टाचा अधिकृत एजंट असून, त्याच्याकडे पोस्ट तिकिटे विकण्याचा अधिकृत परवाना आहे, तर अहमद आणि रझा अनुक्रमे दिल्ली, बिहारचे रहिवासी आहेत. या दोघांनी बनावट तिकिटे छापली आणि ती अर्ध्या किमतीत विकण्यास सुरुवात केली. बिंदने या दोघांकडून विकत घेतलेली बोगस तिकिटे ग्राहकांना विकल्याचे तपासात स्पष्ट झाले. मुंबईहून पाठवलेल्या पाच पत्रांवरील तिकिटे बनावट आहेत, असा संशय व्यक्त करणारे गोपनीय पत्र गेल्या महिन्यात भोपाळ पोस्ट कार्यालयाने मुख्य पोस्ट मास्टर जनरलना पाठवले. त्यानंतर या तिकिटांची नाशिक येथील शासकीय छापखान्यात तपासणी करण्यात आली. तेव्हा ती बनावट असल्याचे स्पष्ट झाले. यानंतर पोस्ट निरीक्षक आशुतोष कुमार यांनी तक्रार दिली. त्या आधारे गुन्हा नोंदवून एमआरए मार्ग पोलिसांनी तपास सुरू केला होता.

असा लागला सुगावा
बनावट तिकिटे असलेली पत्रे एका वित्तीय कंपनीने पाठवली होती. चौकशीत कंपनीने सांगितले की, ‘१० जून आणि १३ जून रोजी सुमारे १२ हजार पत्रे आरोपी राकेश बिंदने पाठवली. पोलिसांनी बिंद यास ताब्यात घेत चौकशी केली. त्यात त्याने बनावट तिकिटे अहमद, रझा यांच्याकडून अर्ध्या किमतीत विकत घेतल्याचे कबूल केले. त्यानुसार पोलिसांनी या दोघांची शोधाशोध सुरू केली. त्यांना १६ ऑक्टोबर रोजी अटक करण्यात पोलिसांना यश आले. सध्या हे आरोपी पोलिस कोठडीत असून, त्यांची कसून चौकशी सुरू आहे.