आदिवासीं बांधंवासोबत प्रविण दरेकर यांची दिवाळी

आदिवासीं बांधवांसोबत प्रवीण दरेकर यांची दिवाळी

मुंबई, ता. २३ : संजय गांधी राष्ट्रीय उद्यानातील आदिवासी पाड्यातील नागरिकांसोबत महाराष्ट्र गृहनिर्माण स्वयं/समूह पुनर्विकास प्राधिकरणाचे अध्यक्ष आमदार प्रवीण दरेकर यांनी गुरुवारी (ता. २३) दिवाळी साजरी केली. भाऊबीजेच्या दिवशी त्यांना येथील नागरिकांना फराळ आणि मुलांना फटाक्यांचे वाटप केले.

आदिवासी व वन विभागाच्या कर्मचारी महिलांनी दरेकर यांचे भाऊबीजेनिमित्त औक्षण केले. ‘भाजप या एकमेव पक्षाचे कार्यकर्ते आदिवासी पाड्यातील नागरिकांसोबत दिवाळी साजरी करत आहेत. आपण गेली १५ वर्षे येथील १६ आदिवासी पाड्यांवर दिलासा देण्याचे काम करत आहोत. या झगमगणाऱ्या मुंबईत लोक दिवाळी उत्साहात साजरी करतात. त्या वेळी झोपडपट्टीत, आदिवासी पाड्यातील आदिवासींनीही आनंदाने दिवाळी साजरी करावी, त्यांच्यासोबत आम्हाला येता यावे,’ यासाठी हा कार्यक्रम असल्याचेही दरेकर म्हणाले. आदिवासी पाड्यांचे मूलभूत सुविधा आदी कायद्याच्या चौकटीतील प्रश्न मला माहीत आहेत. तुम्हाला कुठेही बाहेर जाऊ देणार नाही. याच परिसरात तुमचे पुनर्वसन कसे करायचे हे पाहू, खासदार पीयूष गोयल केंद्रात मंत्री असून, ते केंद्रातून लागेल ती मदत देतील. राज्यात वनमंत्री गणेश नाईक संवेदनशील आहेत. त्यामुळे तुमच्यावर अन्याय होऊ देणार नाही. जे काही होईल ते तुमच्या सहमतीनेच होईल, असा विश्वासही दरेकर यांनी या वेळी दिला.

आदिवासी समाजाचा सन्मान
दरेकर म्हणाले की, तुमच्या आई-वडिलांनी जे कष्ट केले ते लक्षात ठेवा. चांगले शिक्षण घ्या, सरकारच्या आदिवासींसाठी अनेक योजना आहेत. मुलांना शिक्षणासाठी सुविधा आहेत. या पाड्यातील मुले चांगले शिक्षण घेऊन मोठे अधिकारी झाले पाहिजेत, अशी अपेक्षाही दरेकरांनी व्यक्त केली. आदिवासी समाजाच्या भगिनी द्रौपदी मुर्मू देशाच्या राष्ट्रपती आहेत. हा आदिवासी समाजाचा सन्मान पंतप्रधान नरेंद्र मोदी यांनी केल्याचेही त्यांनी दाखवून दिले.