‘मुंबई क्लायमेट वीक’चे फेब्रुवारीत आयोजन

‘मुंबई क्लायमेट वीक’चे
फेब्रुवारीत आयोजन
३० देशांतील तज्ज्ञ सहभागी होणार
सकाळ वृत्तसेवा
मुंबई, ता. २८ : फेब्रुवारी २०२६ मध्ये भारत ‘मुंबई क्लायमेट वीक’चे (एमसीडब्ल्यू) आयोजन करणार असून, हा कार्यक्रम मुंबईतील जिओ वर्ल्ड कन्व्हेन्शन सेंटर येथे होणार आहे. महाराष्ट्र सरकारच्या पर्यावरण व हवामान बदल विभाग, महानगरपालिका आणि प्रोजेक्ट मुंबई यांच्या संयुक्त विद्यमाने हा उपक्रम राबवला जाणार आहे.
हवामान बदलाच्या क्षेत्रात संवादातून कृतीकडे जाण्याची वेळ आली आहे. ‘मुंबई क्लायमेट वीक’ हा उपक्रम महाराष्ट्राला आणि भारताला जागतिक हवामान नेतृत्वाच्या भूमिकेत नेईल, असे मत मुख्यमंत्री देवेंद्र फडणवीस यांनी या कार्यक्रमाची घोषणा करताना व्यक्त केले. या कार्यक्रमात ३० हून अधिक देशांतील हवामान तज्ञ, धोरणकर्ते, उद्योग क्षेत्रातील नेते आणि विद्यार्थी सहभागी होण्याची अपेक्षा आहे. पंतप्रधान नरेंद्र मोदी यांच्या हस्ते उद्‍घाटन होण्याची शक्यता आहे. या परिषदेत अन्न व्यवस्था, ऊर्जा संक्रमण आणि शहरी लवचिकता या तीन विषयांवर चर्चा होणार आहे.