‘मविआ’ नेते पोलिस आयुक्तांच्या भेटीला!

‘मविआ’ नेते पोलिस आयुक्तांच्या भेटीला!
मोर्चाच्या परवानगीसह नियोजनाबाबत चर्चा
सकाळ वृत्तसेवा
मुंबई, ता. २८ ः स्थानिक स्वराज्य संस्थांच्या निवडणुकांपूर्वी मतदार याद्यांतील त्रुटी दूर करण्याच्या मागणीसाठी महाविकास आघाडी आणि महाराष्ट्र नवनिर्माण सेनेने १ नोव्हेंबर रोजी निवडणूक आयोगाविरोधात मोर्चाचे आयोजन केले आहे. या पार्श्वभूमीवर या मोर्चास पोलिसांकडून परवानगी मिळावी, उचित बंदोबस्त पुरवावा, या मागण्यांसह मोर्चाच्या नियोजनाबाबत मविआच्या नेत्यांनी मंगळवारी (ता. २८) पोलिस आयुक्त देवन भारती यांची भेट घेतली.
हा मोर्चा मतदार याद्यांमधील चुका आणि गोंधळाविरोधात आहे. हा मोर्चा ‘फॅशन स्ट्रीट’ येथून निघणार असून दुपारी एक वाजल्यापासून जमाव सुरू होईल. सुमारे दोन वाजता मोर्चाला सुरुवात होईल. मध्य रेल्वेमार्गावरून येणारे कार्यकर्ते आझाद मैदानातून जाणाऱ्या रस्त्याने फॅशन स्ट्रीटपर्यंत पोहोचतील, तर चर्चगेटकडून येणारे कार्यकर्ते बॉम्बे हॉस्पिटलकडून मार्गक्रमण करतील. बीएमसी मुख्यालयाबाहेर व्यासपीठ उभारण्यात येईल आणि तिथे काही नेत्यांची भाषणे होतील. पाऊस आला तरी आंदोलन होणारच, अशी माहिती शिवसेना ठाकरे पक्षाचे खासदार अरविंद सावंत यांनी दिली. नागरिकांना वाहतूक कोंडीत अडकावे लागू नये, याची काळजी घेतली आहे. हे आंदोलन नागरिकांच्या हिताचे आहे, कारण मतदार याद्यांतील फेरफार हा लोकशाही प्रक्रियेलाच धोका आहे, असे राष्ट्रवादी काँग्रेस शरद पवार गटाचे आमदार जितेंद्र आव्हाड म्हणाले.