महिला डॉक्टर आत्महत्येची एसआयटी चौकशी करा!

महिला डॉक्टर आत्महत्येची
एसआयटी चौकशी करा!
महापालिका मार्डची मागणी
मुंबई, ता. २९ ः फलटण उपजिल्हा रुग्णालयातील वैद्यकीय अधिकाऱ्याच्या संशयास्पद मृत्यूनंतर महाराष्ट्र असोसिएशन ऑफ रेसिडेंट डॉक्टर्सने (मार्ड) या प्रकरणाचा तपास स्वतंत्र विशेष तपास पथकाकडे (एसआयटी) वर्ग करण्याची मागणी केली आहे. या घटनेने वैद्यकीय सेवकांच्या कार्यस्थळावरील सुरक्षा, प्रशासकीय जबाबदारी आणि डॉक्टरांच्या सन्मानाबाबत गंभीर प्रश्न उपस्थित केले आहेत.
उच्च न्यायालयाचे निवृत्त न्यायमूर्ती आणि वरिष्ठ महिला आयपीएस अधिकारी यांच्या नेतृत्वाखालील या प्रकरणाची एसआयटीमार्फत न्यायालयीन देखरेखीखाली करण्याची मागणी केली आहे. तसेच, ही केस बीड येथील फास्ट ट्रॅक न्यायालयात विशेष सरकारी वकिलाच्या उपस्थितीत चालवावी, संबंधित अधिकाऱ्यांवर कठोर कारवाई करावी, अशी मागणीही करण्यात आली आहे. याशिवाय डॉक्टरांच्या कार्यस्थळी सुरक्षा सुनिश्चित करण्यासाठी आरोग्य संरक्षण कायद्याची तातडीने अंमलबजावणी आणि स्वतंत्र वैद्यकीय तक्रार निवारण प्राधिकरण स्थापन करण्याची मागणी करण्यात आली आहे.