एसटीचे सात मद्यपी कर्मचारी निलंबित

एसटीचे सात मद्यपी कर्मचारी निलंबित
सुरक्षा व दक्षता मोहिमेत १,७०१ जणांची तपासणी
सकाळ वृत्तसेवा
मुंबई, ता. ३० : एसटी कर्मचाऱ्यांवर दररोज लाखो प्रवाशांची सुरक्षित वाहतूक करण्याची जबाबदारी असते; मात्र काही कर्मचारी मद्यपान करून कर्तव्य बजावत असल्याच्या तक्रारी आल्या होत्या. परिवहन मंत्री तथा एसटी महामंडळाचे अध्यक्ष प्रताप सरनाईक यांनी आदेशानुसार, राज्यातील १,७०१ कर्मचाऱ्यांची तपासणी केली असता दोषी आढळलेल्या सात कर्मचाऱ्यांना निलंबित करण्यात आले.
सरनाईक यांच्या आदेशानुसार एसटीच्या सुरक्षा आणि दक्षता विभागाने राज्यातील सर्व विभागांमध्ये २८ ऑक्टोबरला अचानक मद्यपान तपासणी मोहीम राबविली. या वेळी संशयास्पद कर्मचाऱ्यांची तपासणी केली असता, त्यात दोषी आढळलेल्या कर्मचाऱ्यांवर दोषारोप निश्चित करण्यात आले. त्यात एक चालक, चार यांत्रिक कर्मचाऱ्यांसह एकूण सात कर्मचाऱ्यांचा समावेश आहे.
----
भविष्यात कर्तव्यावर असताना कर्मचारी मद्यपान केलेले आढळल्यास त्यांच्यावर कोणतीही दयामाया न दाखवता कठोर कारवाई करण्यात येईल. भविष्यात नव्या बसगाड्यांमध्ये चालकापुढे ब्रेथ ॲनालायझर यंत्र बसविण्यात येणार आहे.
- प्रताप सरनाईक, परिवहन मंत्री
----
विभागनिहाय दोषी कर्मचारी
धुळे - यांत्रिक कर्मचारी, स्वच्छता कर्मचारी आणि चालक
नाशिक - चालक
परभणी - यांत्रिक कर्मचारी
भंडारा - यांत्रिक कर्मचारी
नांदेड - वाहक