डॉ. बाळकृष्ण भोसले यांना फ्रेंच सरकारची शिष्यवृत्ती

डॉ. बाळकृष्ण भोसले यांना
फ्रेंच सरकारची शिष्यवृत्ती
मुंबई, ता. ३१ ः मुंबई विद्यापीठाच्या समाजशास्त्र विभागातील ज्येष्ठ प्रा. डॉ. बाळकृष्ण भोसले यांची फ्रेंच सरकारच्या ‘वैज्ञानिक उच्चस्तरीय अतिथी संशोधक शिष्यवृत्ती २०२५’साठी निवड करण्यात आली आहे. या शिष्यवृत्तीनुसार डॉ. भोसले हे फ्रान्समधील बोर्डो विद्यापीठात १ ते १४ नोव्हेंबर या कालावधीत शैक्षणिक भेट देणार असून ‘दलित दृष्टिकोनातून हिंदू धर्म’ आणि ‘भारतातील ग्रामीण मजूर स्थिती’ या विषयांवर व्याख्याने देणार आहेत. तसेच ‘फ्रान्समधील वारसा पर्यटनातील मजूर : भारताशी तुलनात्मक अभ्यास’ या विषयावर संशोधन करणार आहेत.

मुंबई विद्यापीठातील समाजशास्त्र विभागाचे प्रमुख प्रा. डॉ. बाळकृष्ण भोसले यांना अध्यापन आणि संशोधनाचा दीर्घ अनुभव आहे. त्यांच्या या निवडीबद्दल मुंबई विद्यापीठाचे कुलगुरू प्रा. रवींद्र कुलकर्णी यांनी त्यांचे अभिनंदन करून शुभेच्छा दिल्या आहेत. राष्ट्रीय आणि आंतरराष्ट्रीय स्तरावरील ख्यातनाम नियतकालिक आणि प्रकाशनांच्या माध्यमातून विविध विषयांवरील लेख आणि पुस्तकांच्या माध्यमातून त्यांनी समाजशास्त्रातील अनेक पैलूंवर प्रकाश टाकला आहे. ऑक्सफर्ड विद्यापीठातील सेड बिझनेस स्कूलमधून त्यांनी अकॅडेमिक लीडरशिप डेव्‍हलपमेंट प्रोग्राम पूर्ण केला आहे. डॉ. भोसले यांना यापूर्वी इटलीतील पॉलिटेक्निक युनिव्हर्सिटी ऑफ मार्शीने अभ्यागत प्राध्यापक म्हणून आमंत्रित केले होते.